თბილისი, 23 იანვარი — Sputnik. ამერიკული IT-კომპანია HP დაეხმარება საქართველოს სკოლებისთვის ელექტრონული ბიბლიოთეკის სისტემის აწყობის პროცესში, ნათქვამია საქართველოს განათლებისა და მეცნიერების სამინისტროს ვებგვერდზე გავრცელებულ განცხადებაში.
აღნიშნული საკითხი განიხილა საქართველოს განათლებისა და მეცნიერების მინისტრმა მიხეილ ჩხენკელმა საინფორმაციო ტექნოლოგიების სფეროში ერთ-ერთი უმსხვილესი ამერიკული კომპანიის HP-ის წარმომადგენლებთან გამართულ შეხვედრაზე.
კომპანია HP-ის წარმომადგენლებმა აღნიშნეს, რომ სკოლებში ელექტრონული ბიბლიოთეკების დანერგვა გაზრდის მოსწავლეთა ხელმისაწვდომობას ყველა ტიპის ლიტერატურაზე.
მხარეებმა ასევე განიხილეს უახლესი ტექნოლოგიების სრული დანერგვის შესაძლებლობა სასწავლო პროცესში, მათ შორის პროფესიულ განათლებაშიც. ამის შედეგად სხვადასხვა პროფესიის დაუფლება შესაძლებელი იქნება ვირტუალური სავარჯიშოების და პრაქტიკის დახმარებით.
მიხეილ ჩხენკელი კომპანია HP-ის წარმომადგენლებს შეხვდა განათლების მსოფლიო ფორუმის ფარგლებში, რომელიც ლონდონში მიმდინარეობს. ფორუმში, რომელიც 21 იანვარს გაიხსნა, ასამდე ქვეყნის განათლების მინისტრი და ოფიციალური პირი მონაწილეობს.