თბილისი, 10 იანვარი — Sputnik. შინაგან საქმეთა სამინისტროს დაცვის პოლიციის თანამშრომლები „საქართველოს ბანკის“ უსაფრთხოების დაცვას უზრუნველყოფენ, ნათქვამია უწყების მიერ გავრცელებულ განცხადებაში.
შსს-სა და „საქართველოს ბანკს“ შორის მემორანდუმს ხელი დაცვის პოლიციის დეპარტამენტის თავმჯდომარე გიგა ნიკოლეიშვილმა და „საქართველოს ბანკის“ ოპერაციების დირექტორის მოადგილე ალექსანდრე გამყრელიძემ მოაწერეს.
დოკუმენტის თანახმად, შსს-ს დაცვის პოლიციის დეპარტამენტი „საქართველოს ბანკის“ სერვის–ცენტრების დაცვას საპოლიციო ძალით უზრუნველყოფს, ხოლო ობიექტების პატრულირებას სათანადოდ აღჭურვილი ავტოტრანსპორტით განახორციელებს.
მემორანდუმის მიზანია შსს-ს დაცვის პოლიციასა და „საქართველოს ბანკს“ თანამშრომლობის გაღრმავება, ბანკის სერვის–ცენტრების, მათი თანამშრომლებისა და მომხმარებლების უსაფრთხოების გაძლიერება.
შსს-ს დაცვის პოლიცია „საქართველოს ბანკის“ ინკასაციას 2013 წლიდან ახორციელებს.