თბილისი, 7 მაისი - Sputnik. საქართველო დაინტერესებულია, რომ შეერთებულ შტატებთან ურთიერთობები უფრო პოზიტიურ და არსებით ჩარჩოებში მოექცეს, ორივე ქვეყნის ინტერესების გათვალისწინებით - ვაშინგტონი უკვე დგამს ნაბიჯებს დიალოგის გასააქტიურებლად, განაცხადა საქართველოს საგარეო საქმეთა მინისტრმა მაკა ბოჭორიშვილმა.
საგარეო საქმეთა მინისტრის თქმით, უახლოეს მომავალში მოსალოდნელია ამერიკული დელეგაციების ვიზიტები, რა დროსაც მხარეები ორმხრივი ურთიერთობების ამჟამინდელ მდგომარეობას და შემდგომი თანამშრომლობის პერსპექტივებს განიხილავენ.
„გარკვეული დინამიკა არის და მე იმედი მაქვს, რომ ჩვენი ურთიერთობები ბევრად უფრო შინაარსიანი და პოზიტიური იქნება, ვიდრე ბოლო წლების განმავლობაში”, - განაცხადა საგარეო საქმეთა მინისტრმა „ტელეიმედის“ ეთერში.
მან აღნიშნა, რომ საქართველოს არ დაუმალავს თავისი პოზიციები და დამოკიდებულება ამერიკის შეერთებულ შტატებთან, ვერავინ ვერ უარყოფს ამერიკის შეერთებული შტატების როლს რეგიონშიც და გლობალურად დონეზეც.
„რა თქმა უნდა, არსებობს სუბიექტური ინტერესი რომ ამერიკის შეერთებულ შტატებთან ურთიერთობები იყოს კარგი“, - განაცხადა ბოჭორიშვილმა.
როგორც მინისტრმა განაცხადა, ქვეყნებს შორის სტრატეგიული თანამშრომლობა წინა ადმინისტრაციის მიერ იქნა შეჩერებული, მაგრამ ქართული მხარე დაინტერესებულია რომ ურთიერთობები მოექცეს პოზიტიურ ჩარჩოებში.
„ამას, რა თქმა უნდა, სჭირდება მუშაობა. სჭირდება ძალიან ბევრი გაცვლა პოზიციების და ძალიან სასიხარულოა, რომ ამერიკის შეერთებული შტატების მხრიდან გარკვეული ნაბიჯები იდგმება იმისთვის, რომ იყოს ამ შეხვედრების და ჩვენი პოზიციების გაცნობის შესაძლებლობა”, - განაცხადა მაკა ბოჭორიშვილმა.
მინისტრმა ხაზგასმით აღნიშნა, რომ თანამშრომლობის შემდგომი განვითარება მოითხოვს აქტიურ მუშაობას, პოზიციების ურთიერთგაცვლას, საერთო ინტერესებისა და შეხების წერტილების განსაზღვრას.
საქართველო და აშშ
საქართველოსა და ამერიკის შეერთებულ შტატებს შორის ურთიერთობები ამჟამად ფორმალურ ხასიათს ატარებს. აშშ-ის ყოფილი პრეზიდენტის, ჯო ბაიდენის ადმინისტრაციის დროს, ქვეყნებს შორის შეჩერდა სტრატეგიული პარტნიორობა, რომელიც 2009 წლიდან მოქმედებდა და არაერთ ქართველ მაღალჩინოსანს სავიზო სანქციები დაუწესდა.
ფინანსური შეზღუდვები დაუწესდა ასევე საქართველოს მმართველი პარტიის, "ქართული ოცნება - დემოკრატიული საქართველოს", საპატიო თავმჯდომარე ბიძინა ივანიშვილს.
ურთიერთობების გაუარესების მიზეზი საქართველოში მიღებული არაერთი კანონი იყო, რომელიც, ბაიდენის ადმინისტრაციის თქმით, "ეწინააღმდეგება დემოკრატიის პრინციპებს".
ხელისუფლებაში დონალდ ტრამპის მოსვლის შემდეგ, თბილისის მთავრობამ არაერთხელ გამოთქვა სურვილი, გადატვირთოს ურთიერთობები და გააფორმოს ახალი შეთანხმება სტრატეგიული პარტნიორობის შესახებ თანასწორი პირობებით, მათ შორის ქვეყნის მოქალაქეებისთვის უვიზო რეჟიმის და პირდაპირი რეისების დაწყების ჩათვლით. "ქართულ ოცნებას" ამ ინიციატივაზე ჯერ მკაფიო პასუხი არ მიუღია.
რიგი ევროპული ქვეყნისგან განსხვავებით, ტრამპის ადმინისტრაცია ეჭვქვეშ არ აყენებს საქართველოს მთავრობის ლეგიტიმურობას, თუმცა მაღალი დონის კონტაქტები ჯერ არ არსებობს და ურთიერთქმედება შემოიფარგლება კომუნიკაციით დიპლომატიური მისიების მეშვეობით და ასევე სატელეფონო საუბრით პრემიერ ირაკლი კობახიძესა და სახელმწიფო მდივან მარკო რუბიოს შორის.