თბილისი, 30 აპრილი — Sputnik. ბრაკონიერობასთან ბრძოლის ფარგლებში, ქვეყნის მასშტაბით 2060 მეტრზე მეტი სიგრძის სახლართი ბადე და 60-მდე თევზმახეა ამოღებული, იუწყება გარემოსდაცვითი ზედამხედველობის დეპარტამენტი.
2026 წელს აჭარისა და გურიის, სამეგრელო-ზემო სვანეთის, შიდა ქართლისა და მცხეთა-მთიანეთის რეგიონული სამმართველოების თანამშრომლების მიერ პრევენციული ღონისძიებები გატარდა მდინარეებზე - ჭოროხი, ტარჩენა, ენგური, ჩხოუში, მუნჩია, ხობისწყალი, მტკვარი, ასევე, გრიგოლეთის, ფოთისა და ბაზალეთის ტბებზე, სიონისა და ჟინვალის წყალსაცავებზე. გარემოსდაცვითი პატრულირებისა და სწრაფი რეაგირების თანამშრომლების მიერ კი პრევენციული ღონისძიებები გატარდა თბილისის ზღვაზე.
"ღონისძიებების შედეგად ამოღებულია ჯამში 2060 მეტრზე მეტი სიგრძის სახლართი ბადე და 60-მდე თევზმახე - ე.წ. "გოდორი", "ფაცერი" და "ოჩხი". თევზმახეებსა და ბადეებში გახლართული თევზი გარემოსდაცვითი ზედამხედველობის დეპარტამენტის თანამშრომლებმა ბუნებრივ გარემოში დააბრუნეს", - აღნიშულია ინფორმაციაში.
როგორც უწყებაში აღნიშნავენ, ბრაკონიერობის წინააღმდეგ ბრძოლა მათთვის პრიორიტეტული მიმართულებაა.
გარემოსდაცვითი ზედამხედველობის დეპარტამენტის შესაბამისი სამსახურები 24-საათიან პატრულირებას და სამინისტროს ცხელ ხაზზე (153) შემოსულ შეტყობინებებზე მყისიერ რეაგირებას ახდენენ.
პარალელურად, პრევენციული ღონისძიებები ტარდება განსაკუთრებით ისეთ ლოკაციებზე, სადაც ბრაკონიერობის ფაქტები ბოლო წლებში შედარებით ხშირია.