თბილისი, 9 აპრილი – Sputnik. მთავრობა პროგრამის „აწარმოე საქართველოში“ ბაზაზე ქმნის ახალ ინსტიტუციას, რის შედეგადაც კერძო სექტორისთვის გაიზრდება ფინანსებზე ხელმისაწვდომობა, განაცხადა პრემიერ-მინისტრმა ირაკლი კობახიძემ.
მთავრობის პროგრამა „აწარმოე საქართველოში“ ერთ-ერთი ყველაზე წარმატებულია ქვეყანაში. ის 2014 წლის ზაფხულში შეიქმნა და მიზნად ისახავს საქართველოში ადგილობრივი წარმოების სტიმულირებას. 2017 წლის აპრილში შეიქმნა ამავე სახელწოდების სააგენტო.
„დღეს ჩვენი გადაწყვეტილებით შეიქმნება ახალი ინსტიტუცია, სახელწოდებით - საქართველოს ეკონომიკის განვითარების კორპორაცია. ეს ინსტიტუცია შეიქმნება სააგენტოს „აწარმოე საქართველოში“ ბაზაზე და მასში განხორციელდება რამდენიმე, მათ შორის საქართველოს განვითარების ფონდის ფუნქციის შერწყმა“, - განაცხადა კობახიძემ.
მისი თქმით, პროგრამას „აწარმოე საქართველოში“ დაემატება ახალი ინსტრუმენტები, ასევე განხორციელდება არსებული ინსტრუმენტების ოპტიმიზაცია, რის შედეგადაც კერძო სექტორისთვის გაიზრდება ფინანსებზე ხელმისაწვდომობა.
„ახალი ინიციატივები მოიცავს სინდიცირებულ სესხებს და კაპიტალის ბაზრის განვითარების ინსტრუმენტებს. განსაკუთრებული ყურადღება დაეთმობა კონკრეტულ სექტორებს, მათ შორის ენერგეტიკას, სადაც კომპანიებს გაეზრდებათ წვდომა იაფ სესხებზე. ეკონომიკის სამინისტროში დამოუკიდებელ უწყებად ჩამოყალიბდება ინვესტიციების სააგენტო, რომელიც აქტიურად იმუშავებს ახალი უცხოური ინვესტიციების მოზიდვაზე საქართველოში“, - განაცხადა მთავრობის მეთაურმა.
საინვესტიციო სააგენტო 2017 წელს გაუქმდა, მის ფუნქციებს კი საპარტნიორო ფონდი ახორციელებდა. 2026 წელს საქართველოს მთავრობამ რეფორმის ფარგლებში გააუქმა საპარტნიორო ფონდი, რომელსაც 2023 წლიდან საქართველოს განვითარების ფონდი ერქვა და ინვესტიციების მოზიდვაში იყო ჩართული.