თბილისი, 1 აპრილი - Sputnik. ორთაჭალაში, რუსთავი–თბილისის დამაკავშირებელი საავტომობილო გზის მონაკვეთზე დაზიანებული ინფრასტრუქტურის აღდგენითი სამუშაოები დაიწყო, განაცხადა თბილისის მერმა კახა კალაძემ დედაქალაქის მთავრობის დღევანდელ სხდომაზე.
აღნიშნულ საგზაო მონაკვეთზე რამდენიმე კვირის წინ მდინარე მტკვრის ნაპირსამაგრი ჯებირი დაზიანდა, რის შედეგადაც სავალ ნაწილსა და ტროტუარზე ბზარები გაჩნდა.
„პრობლემის დაფიქსირებისთანავე უსაფრთხოების მიზნით დაზიანებულ მონაკვეთზე ავტოტრანსპორტის მოძრაობა ნაწილობრივ შეიზღუდა და გატარდა ყველა აუცილებელი პირველადი ღონისძიება. პარალელურად დარგის სპეციალისტების მიერ ჩატარდა კვლევა, რომლის მიზანიც იყო დაზიანების გამომწვევი მიზეზების იდენტიფიცირება და შესაბამისი პრევენციული ღონისძიებების დაგეგმვა“, - განაცხადა კალაძემ.
კვლევის მიხედვით, პროცესის ძირითადი მიზეზი გრუნტში მიწისქვეშა და ზედაპირული წყლების ინტენსიური ჩადინებაა, რასაც ემატება მდინარე მტკვრის ჰიდროდინამიკური ზემოქმედება ნაპირდაცვით კონსტრუქციებზე, ასევე მიწისქვეშა წყლების დონის სეზონური მერყეობა.
მერიის ინფორმაციით, ამ ეტაპზე მიმდინარეობს აღდგენითი სამუშაოები, რომელიც მოიცავს ნაპირსამაგრი ინფრასტრუქტურის გაძლიერებას და უსაფრთხო გადაადგილებისთვის გზის დაზიანებული მონაკვეთის სრულ აღდგენას.
აღდგენით სამუშაოებს დაახლოებით ოთხი თვე დასჭირდება. დროის ამ მონაკვეთში ავტომობილებით გადაადგილება ნაწილობრივ შეაზღუდება. პროექტის ღირებულება 3,5 მლნ ლარს შეადგენს.