თბილისი, 14 მარტი - Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა წინასწარი შეთანხმებით ჯგუფის მიერ განსაკუთრებით დიდი ოდენობით საქონლის საბაჟო წესების დარღვევით გადმოტანის ფაქტზე 4 პირი დააკავეს, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ ბრალდებულებმა საბაჟო გამშვები პუნქტი "ყაზბეგის" გავლით სატვირთო ავტომანქანაში სპეციალურად მოწყობილი სამალავის გამოყენებით საბაჟო კონტროლისგან მალულად გადმოიტანეს 18 ათასი კგ უნივერსალური დანამატი "ოქტან+".
უწყების ცნობით, ბრალდებულებს საბაჟო წესების დარღვევით საქართველოში სისტემატურად შემოჰქონდათ ნივთიერება "ოქტან+", რომელსაც ავტომობილებისათვის განკუთვნილი საწვავის მისაღებად იყენებდნენ.
"დანაშაულებრივი ჯგუფის წევრები გარდაბნის მუნიციპალიტეტის სხვადასხვა ლოკაციაზე არსებულ საამქროებში კუსტარულად დამზადებული საწვავის რეალიზაციას თბილისში მდებარე მათსავე კუთვნილ ბენზინგასამართ სადგურებზე ახდენდნენ", - ნათქვამია განცხადებაში.
საგამოძიებო მოქმედებების შედეგად ამოღებული ნივთიერების ღირებულება 22 ათას ლარს აღემატება.
გამოძიება მიმდინარეობს საქართველოს სსკ-ის 214-ე და 218-ე მუხლებით, რაც სასჯელის სახით ითვალისწინებს თავისუფლების აღკვეთას 8-დან 11 წლამდე ვადით.