როგორ შეიცვალა ბინების ფასები თბილისში - ახალი სტატისტიკა

თბილისი, 3 თებერვალი – Sputnik. თბილისში ახალ საცხოვრებელ ბინებზე ფასების წლიური ინდექსი 2025 წლის მეოთხე კვარტალში 7%-ით გაიზარდა, ამასთან მესამე კვარტალთან შედარებით ფასები 1,5%-ით გაიზარდა, იუწყება სტატისტიკის ეროვნული სამსახური „საქსტატი".

2020 წლის საშუალო წლიურ მაჩვენებელთან შედარებით, თბილისში ახალ საცხოვრებელ ბინებზე ფასების წლიური ინდექსი მეოთხე კვარტალში 59,4%-ით გაიზარდა.

„საქსტატის" მონაცემებით, ახალაშენებული ბინების ფასები 2025 წლის მეოთხე კვარტალში მესამე კვარტალთან შედარებით 1,3%-ით გაიზარდა, 2024 წლის მეოთხე კვარტალთან შედარებით კი 3,5%-ით გაიზარდა.

თბილისში ახალაშენებულ კერძო სახლებზე ფასები 2025 წლის მეოთხე კვარტალში მესამე კვარტალთან შედარებით 2,1%-ით გაიზარდა, 2024 წლის მეოთხე კვარტალთან შედარებით კი 2,5%-ით გაიზარდა.

„საქსტატის" კვლევის თანახმად, 2025 წლის მეოთხე კვარტალში ერთი კვადრატული მეტრის საშუალო ფასმა ახლად აშენებულ კორპუსებში შეადგინა: ე.წ. შავი კარკასი – 3.260 ლარი, თეთრი კარკასი – 3.574ლარი, მწვანე კარკასი – 4.318 ლარი.

2024 წლის მეოთხე კვარტალში ფასები ასეთი იყო: ე.წ. შავი კარკასი - 3.230 ლარი, თეთრი კარკასი – 3.562 ლარი, მწვანე კარკასი – 4.085 ლარი.

ფასების ინდექსი მაკროეკონომიკური და ფინანსური სტაბილურობის მნიშვნელოვანი ინდიკატორია და მას უმეტესად საქართველოს ეროვნული ბანკი და კერძო დეველოპერები იყენებენ. ის, ერთი მხრივ, ემსახურება უძრავი ქონების განვითარებისა და ბაზრის რისკების შეფასებას, ხოლო მეორე მხრივ – უძრავი ქონების ბაზარსა და ფინანსურ სტაბილურობასთან კავშირების დადგენასა და შეფასებას.