ექს-პრემიერ გახარიას პარტია ხელისუფლებასთან დებატებზე თანახმაა, მხოლოდ ერთი პირობით

თბილისი, 2 თებერვალი — Sputnik. პარტია „გახარია საქართველოსთვის“ მმართველი პარტიის წარმომადგენლებთან საჯარო დებატებისთვის ნებისმიერ დროს არის მზად, თუმცა არა „რუსთავი 2“-ის მიერ შემოთავაზებული ფორმატით, ნათქვამია ოპოზიციური პარტიის მიერ გავრცელებულ განცხადებაში.

გასულ კვირას ტელეკომპანია „რუსთავი 2“-მა საჯარო დებატების ახალი პროექტის დაწყების შესახებ განაცხადა. პირველი დისკუსია 2 თებერვალს, 22:00 საათზე გაიმართება. გადაცემის წამყვანი ჟურნალისტი რეზი ჭიჭინაძე იქნება. ინიციატივა მოჰყვა პრემიერ-მინისტრის წინადადებას, რომელიც პოლიტიკური პოლარიზაციის შესამცირებლად და კონსტრუქციული დიალოგის კულტურის ხელშეწყობის მიზნით ოპოზიციასთან ღია დებატების გამართვას ითვალისწინებს.

როგორც ყოფილი პრემიერ-მინისტრის პარტიაში აღნიშნეს, „რუსთავი 2"-ის მიერ 2 თებერვლის დებატების ფორმატი - ფარსი და პროპაგანდის გაგრძელებაა.

გუშინ, პრემიერმა კობახიძემ განაცხადა, რომ მზადაა მოლაპარაკებების მაგიდასთან დაჯდეს და საჯარო დებატები გამართოს საზოგადოებისთვის მნიშვნელოვან ნებისმიერ თემაზე.

კერძოდ, მთავრობის მეთაური მზადაა უმაღლესი განათლების რეფორმის საკითხზე დებატებზე იმ სტუდენტებთან გამართოს, რომლებიც საქართველოს ორი უდიდესი უნივერსიტეტის - ჯავახიშვილის სახელობის თბილისის სახელმწიფო უნივერსიტეტისა და საქართველოს ტექნიკური უნივერსიტეტის გაერთიანებას აპროტესტებენ.

რაც შეეხება პოლიტიკურ დებატებს, ამ დროისთვის პოლიტიკური დებატების გამართვაზე მზადყოფნა მთავრობისადმი ლოიალურმა ორმა ტელეკომპანიამ - „იმედმა" და „რუსთავი 2“-მა გამოთქვა.

დებატებისთვის მზაობა გამოთქვა არასაპარლამენტო ოპოზიციურმა პარტიამ „ახალი პოლიტიკური ცენტრი - გირჩი“ და საპარლამენტო პარტიამ „საქართველოსთვის“. დებატებისთვის მხოლოდ საკუთარი პირობებით - პირდაპირ ეთერში და დიალოგის ფორმატში - მზად არიან პარტია „თავისუფლების მოედნის“ წარმომადგენლებიც.