თბილისი, 20 იანვარი — Sputnik. პრეზიდენტის შეწყალების აქტის საფუძველზე 159-მა მსჯავრდებულმა უკვე დატოვა სასჯელაღსრულების დაწესებულება, იუწყება ტელეკომპანია „იმედი“.
19 იანვარს, საქართველოს პრეზიდენტმა მიხეილ ყაველაშვილმა ნათლისღების დღესასწაულთან დაკავშირებით 159 პატიმარი შეიწყალა.
პრეზიდენტის ადმინისტრაციის ცნობით, პრეზიდენტმა მისთვის კონსტიტუციით მინიჭებული ექსკლუზიური უფლებამოსილება გამოიყენა, რომელიც ეფუძნება ჰუმანიზმის პრინციპსა და სახელმწიფო ინტერესს.
მოსალოდნელი იყო, რომ შეწყალებულთა სიაში საპროტესტო აქციების დროს დაკავებული პირებიც მოხვდებიოდნენ, ამიტომ პატიმრების ნათესავები შეწყალების აქტს რუსთავისა და გლდანის ციხეებთან დილიდან ელოდნენ. ბრძანებულებას ხელი დაახლოებით 22:30 საათზე მოეწერა. ამ დრომდე უცნობია იმ პირთა ვინაობა, ვინ შეიწყალა მიხეილ ყაველაშვილმა.
გასულ წელს ნათლისღების დღესასწაულთან დაკავშირებით მიხეილ ყაველაშვილმა 613 მსჯავრდებული პირი შეიწყალა.
შეწყალება საქართველოს პრეზიდენტის დისკრეციული უფლებაა, გადაწყვეტილებას შეწყალების შესახებ სახელმწიფოს მეთაური ერთპიროვნულად იღებს. შეწყალება შეიძლება შეეხოს ნებისმიერ მსჯავრდებულს, რომელსაც სასამართლომ უკვე გამოუტანა განაჩენი.