თბილისი, 28 დეკემბერი – Sputnik. თუ კიევი არ მოისურვებს საკითხის მშვიდობიანი გზით მოგვარებას, რუსეთი ყველა ამოცანას შეიარაღებული გზით გადაჭრის, განაცხადა რუსეთის პრეზიდენტმა ვლადიმირ პუტინმა რუსეთის სამხედრო ძალების სამეთაურო პუნქტში ვიზიტის დროს, სადაც მოისმინა რუსეთის შეიარაღებული ძალების გენშტაბის უფროსის ვალერი გერასიმოვის მოხსენება.
„შეტევების ტემპების გათვალისწინებით, ჩვენი დაინტერესება, რომ უკრაინული სამხედრო ფორმირებები მათ მიერ ამჟამად დაკავებული ტერიტორიებიდან ნებაყოფლობით გავიდნენ, ფაქტობრივად, ნულს უტოლდება“, – განაცხადა პუტინმა.
სამეთაური პუნქტში პუტინმა მოისმინა სამხედროების ანგარიში დონეცკის ოლქში ქალაქ მირნოგრადის და ზაპოროჟიეს ოლქში გულიაიპოლეს დაკავების შესახებ.
„დასავლეთში „ჭკვიანი ადამიანები“ კიევს კონფლიქტის დასასრულებლად ღირსეული პირობების მიღებას ურჩევენ. გარდა ამისა, დასავლეთი კიევის ხელისუფლებას „კარგ საბაზისო პირობებს სთავაზობს უკრაინის გრძელვადიანი უსაფრთხოების უზრუნველსაყოფად“, ასევე პირობებს უკრაინის ეკონომიკისა და რუსეთთან ურთიერთობების აღსადგენად", - განაცხადა რუსეთის პრეზიდენტმა.
მისი თქმით, კიევში არ ჩქარობენ კონფლიქტის მშვიდობიანი საშუალებებით გადაწყვეტას.
„უკრაინა თუ არ ისურვებს საქმის მშვიდობიანი გზით დასრულებას, რუსეთი ყველა ამოცანას შეიარაღებული გზით გადაჭრის", - განაცხადა პუტინმა.
როგორც პრეზიდენტმა აღნიშნა, უკრაინის კონფლიქტის თავიდან აცილება შესაძლებელი იქნებოდა, კიევის ხელისუფლება მოსკოვისთვის დროულად რომ მოესმინა.
პუტინის თქმით, დაპირისპირება და სამხედრო მოქმედებები 2014 წელს უკრაინაში სახელმწიფო გადატრიალების შემდეგ განვითარდა და ეს მოვლენები კონფლიქტის საწყისი წერტილი გახდა.
გასულ კვირაში რუსეთის საგარეო საქმეთა მინისტრმა სერგეი ლავროვმა უკრაინის კონფლიქტის ტერიტორიულ საკითხზე საუბრისას განაცხადა, რომ რუსეთის კონსტიტუციის თანახმად, ყირიმი, დონეცკის სახალხო რესპუბლიკა, ლუგანსკის სახალხო რესპუბლიკა, ზაპოროჟიესა და ხერსონის ოლქები რუსეთის განუყოფელი ნაწილი და სუბიექტები არიან.
27 დეკემბერს უკრაინის პრეზიდენტმა ვოლოდიმირ ზელენსკიმ დაასახელა უკრაინის „წითელი ხაზები“ ომის დასრულების შესახებ მოლაპარაკებებში.