თბილისი, 25 დეკემბერი - Sputnik. მთავრობამ დაასრულა „საქართველოს რკინიგზის“ მასშტაბური მოდერნიზაციის პროექტი - ეს არის ქვეყნის მიერ გაკეთებული მკაფიო პოლიტიკური და სტრატეგიული არჩევანი საკუთარი მომავლისა და ეკონომიკური სიძლიერის უზრუნველსაყოფად, განაცხადა საქართველოს პრემიერ-მინისტრმა ირაკლი კობახიძემ სოფელ ქვიშხეთში, პროექტის დასრულების საზეიმო ცერემონიაზე.
„საქართველოს რკინიგზა“ აღმოსავლეთ-დასავლეთის სატრანსპორტო დერეფნის შემადგენელი ნაწილია, ევრაზიის სატრანსპორტო დერეფნის ძირითადი კომპონენტი და ევროპის ცენტრალურ აზიასთან დამაკავშირებელი უმოკლესი მარშრუტი.
„საქართველოს რკინიგზის“ მასშტაბური მოდერნიზაციის პროექტი დასრულდა. ეს არ არის მხოლოდ ინფრასტრუქტურული განახლება. ეს არის მკაფიო პოლიტიკური და სტრატეგიული არჩევანი, რომელიც საქართველომ გააკეთა საკუთარი მომავლის, ეკონომიკური სიძლიერისა და გლობალურ პროცესებში ღირსეული ადგილის დასამკვიდრებლად“, - განაცხადა კობახიძემ.
მთავრობის მეთაურის თქმით, პროექტის ფარგლებში აშენდა ახალი ხიდები და გვირაბები, 100-ზე მეტი საინჟინრო ნაგებობა, დაიგო დაახლოებით 100 კილომეტრი ახალი ლიანდაგი და დამონტაჟდა საერთაშორისო სტანდარტების შესაბამისი უსაფრთხოების სისტემები.
საქართველოს რკინიგზის ისტორიიდან
1872 წლის 10 ოქტომბერს თბილისიდან ფოთში პირველი მატარებელი ჩავიდა. ეს თარიღი საქართველოს რკინიგზის დაბადების დღედ ითვლება.
1883 წელს ექსპლუატაციაში შევიდა თბილის-ბაქოს ხაზი. მისი გაშვების შედეგად აზერბაიჯანის პორტიდან შავი ზღვის გავლით მსოფლიო ბაზრებზე აზერბაიჯანული ნავთობის ექსპორტი დაიწყო.
1899 წელს საქართველომ სომხეთთან სარკინიგზო მიმოსვლა დაამყარა.
1932 წლის 16 აგვისტოს პირველი ელექტროლოკომოტივი სურამის უღელტეხილის გავლით ხაშურიდან ზესტაფონში ჩავიდა.
სახელმწიფო საკუთრებაში არსებული სს „საქართველოს რკინიგზა“ ამჟამად ფლობს როგორც ლიანდაგებს, ასევე მთელ მოძრავ შემადგენლობას. ის უზრუნველყოფს სატვირთო გადაზიდვების მომსახურებას, სხვადასხვა სახის ტვირთის გადაზიდვას, ძირითადად კასპიის ზღვიდან და ცენტრალური აზიიდან აღმოსავლეთით დასავლეთით შავ ზღვამდე.
„საქართველოს რკინიგზა“ ასევე უზრუნველყოფს შიდა და საერთაშორისო სამგზავრო მომსახურებას.
საქართველოში სატრანზიტო მარშრუტების განვითარება საქართველოს მთავრობის ერთ-ერთი უმნიშვნელოვანესი პრიორიტეტია, რომელიც ამ სფეროში დიდ ინვესტიციებს დებს.
ქვეყნის მასშტაბით მშენებარე ძირითადი ინფრასტრუქტურა ახალი „აბრეშუმის გზის“ ნაწილია. ეს არის აღმოსავლეთ-დასავლეთის მაგისტრალი, რკინიგზის მოდერნიზაცია, ბაქო-თბილისი-ყარსის რკინიგზის ხაზი და ანაკლიის ღრმაწყლოვანი პორტის პროექტი.