თბილისი, 30 ნოემბერი — Sputnik. საქართველოს მთავრობამ საკანონმდებლო ორგანოში 2026 წლის სახელმწიფო ბიუჯეტის საბოლოო ვარიანტი წარადგინა.
როგორც პროექტის განმარტებით ბარათშია ნათქვამი, სახელმწიფო ბიუჯეტი ითვალისწინებს როგორც მშპ-ის ზრდის ამჟამინდელ მაჩვენებლებს, ისე საერთაშორისო საფინანსო ინსტიტუტების მონაცემებს მომავალი წლის მსოფლიო ეკონომიკის ზრდის შესახებ, მათ შორის პროგნოზებს საქართველოს მიმართ.
2026 წლის ძირითადი მაკროეკონომიკური მაჩვენებლების პროგნოზი
მაჩვენებელი | 2025 | 2026 |
ეკონომიკური ზრდა, % | 6,0 | 5,0 |
დეფლატორი, % | 3,9 | 4,0 |
მშპ-ის მოცულობა, მლრდ ლარი | 101,2 | 110,5 |
შემოსულობები კონსოლიდირებულ ბიუჯეტში, მლრდ ლარი | 27,5 | 30,3 |
სახბიუჯეტის დეფიციტი, % მშპ-თან | 2,5 | 2,5 |
სახბიუჯეტის ასიგნებები, % მშპ-თან | 30,4 | 29,1 |
პროგნოზის თანახმად, მოსალოდნელია მშპ-ის 5%-მდე ზრდა. ნომინალური მთლიანი შიდა პროდუქტი პროგნოზირებულია 114,1 მლრდ ლარის დონეზე. ბიუჯეტის მთლიანი დეფიციტის პროგნოზი 2,5%-ის დონეზე დადგინდა, ხოლო სახელმწიფო ვალი მშპ-ის დაახლოებით 33,5%-ს შეადგენს.
სახელმწიფო ბიუჯეტის ახალი პარამეტრები
წარმოდგენილი საბოლოო ვარიატის თანახმად, 2026 წლის ბიუჯეტში შემოსულობები, გასული წლის სახელმწიფო ბიუჯეტთან შედარებით გაიზრდება და დაახლოებით 30,8 მლრდ ლარი იქნება.
ამასთან საგადასახადო შემოსავლები 1,5 მლრდ ლარით გაიზრდება და დაახლოებით 24,9 მლრდ ლარს შეადგენს.
საქართველოს სახელმწიფო ბიუჯეტის 2026 წლის საპროგნოზო მაჩვენებლები
მაჩვენებელი | 2025 | 2026 |
შემოსულობები სახელმწიფო ბიუჯეტში | 27 560,8 | 30 290,8 |
საგადასახადო შემოსულობები სახელმწიფო ბიუჯეტში | 21 885,0 | 23 030,0 |
გრანტები | 199,9 | 219,1 |
სახელმწიფო ბიუჯეტის ასიგნებები | 27 941,7 | 30 475,9 |
რაც შეეხება ბიუჯეტის გასავლის ნაწილს, პროექტის თანახმად, 2026 წლის სახელმწიფო ბიუჯეტის ასიგნებების მოცულობა დაახლოებით 2,9 მლრდ ლარით გაიზრდება და დაახლოებით 30 მლრდ ლარს მიაღწევს.
ვინ მიიღებს მეტ თანხას
2026 წელს სახელმწიფო ბიუჯეტიდან ყველაზე მეტ თანხას ჯანდაცვის სამინისტრო მიიღებს, რომლის ბიუჯეტი 840 მლნ ლარით გაიზედება და 9,7 მილიარდი ლარი იქნება. ამ თანხების დიდი ნაწილი, დაახლოებით 6,9 მლრდ ლარი სოციალურ პროგრამებს, მათ შორის პენსიებისა და სოცდახმარებების ზრდას, ხოლო 2 მლრდ ლარი ჯანდაცვას - ექიმების, ექთნებისა და სასწრაფო სამედიცინო დახმარების თანამშრომლების ხელფასების გაზრდას მოხმარდება.
მთავრობის გადაწყვეტილებით, განათლების სამინისტროს ბიუჯეტი 2,7 მლრდ ლარი იქნება, საიდანაც 1,9 მლრდ ლარი სკოლებსა და საბავშვო ბაღებს მოხმარდება, 158,3 მლნ ლარი პროფესიულ, ხოლო 174 მლნ ლარი უმაღლეს განათლებას მოხმარდება.
ინფრასტრუქტურის სამინისტროს ბიუჯეტი 3,1 მლრდ ლარი იქნება, საიდანაც 1,3 მლრდ ლარი მოხმარდება გზების მშენებლობას, დანარჩენი თანხა კი რეგიონალური ინფრასტრუქტურული პროექტების განხორციელებას, წყალმომარაგების სისტემის განახლებას და სკოლების მშენებლობას.
გარემოს დაცვისა და სოფლის მეურნეობის სამინისტროს ბიუჯეტი 808,2 მლნ ლარი იქნება, რეგიონული განვითარების სამინისტროს - 132,9 მლნ ლარი, ეკონომიკის სამინისტროს - 928,6 მლნ ლარი, ფინანსთა სამინისტროს - 130 მლნ ლარი, იუსტიციის სამინისტროს - 442,3 მლნ ლარი, საგარეო საქმეთა სამინისტროს - 225 მლნ ლარი, თავდაცვის სამინისტროს - 1,9 მლრდ ლარი, შინაგან საქმეთა სამინისტროს - 1,6 მლრდ ლარი, კულტურის სამინისტროს - 364,9 მლნ ლარი და სპორტის სამინისტროს - 325,3 მლნ ლარი.