თბილისი, 29 ნოემბერი - Sputnik. იმიგრაციის ახალი წესები პოლონეთზე უარყოფით ეკონომიკურ გავლენას მოახდენს, რადგან იქ სამუშაო ძალა ჩადიოდა, განაცხადა პარლამენტის თავმჯდომარემ შალვა პაპუაშვილმა.
პოლონეთის საელჩოს ცნობით, 2025 წლის 1 დეკემბრიდან საქართველოს მოქალაქეები პოლონეთში გამარტივებული სამუშაო ვიზებით ვეღარ ისარგებლებენ. უკვე დასაქმებულებს შეზღუდული ვადით - კონტრაქტის ვადის გასვლამდე შეეძლებათ მუშაობა.
„ეს არის პოლონეთის მიგრაციის პოლიტიკის ნაწილი, საქართველოდან იქ სამუშაოს მაძიებელთა რაოდენობა იყო დიდი და იმ ქვეყნებისთვის, საიდანაც დიდია მოთხოვნა, უფრო მკაცრი რეგულაციები შემოიღეს. ამას, უპირველეს ყოვლისა, პოლონეთისთვის ექნება ცუდი ეკონომიკური გავლენა, ვინაიდან, რადგან მუშა ხელი იქ ჩადიოდა, ეს იმას ნიშნავს, რომ იქ იყო მოთხოვნა მუშა ხელზე“, - განაცხადა პაპუაშვილმა.
მისი თქმით, ეს სახელმწიფოს შიდა პოლიტიკის საკითხია.
„ჩვენც საკმაოდ მკაცრი მიგრაციის პოლიტიკა გვაქვს და ჩვენთან პოლონელიც ვერ ჩამოვა ასე ადვილად სამუშაოდ. ეს მათი შიდა მიგრაციის საკითხებია“, - განაცხადა პაპუაშვილმა და აღნიშნა, რომ ევროკავშირის სხვა ქვეყნების ამკაცრებენ წესების შრომითი მიგრანტებისთვის.
მისი თქმით, საქართველოს მოქალაქეები სამშობლოშიც შეძლებენ მუშაობას.
„არ ვიცი პოლონეთი როგორ აპირებს მუშა ხელის მოთხოვნა დააკმაყოფილოს. რაც შეეხება საქართველოს მოქალაქეებს, ჯერ ერთი საქართველოში დეფიციტია და გვჭირდება მუშა ხელი“, - განაცხადა პაპუაშვილმა.
პოლონეთის მთავრობის გადაწყვეტილებით, საქართველოს მოქალაქეები ამოიღეს იმ ქვეყნების მოქალაქეების სიიდან, რომლებსაც შეეძლოთ პოლონეთში მუშაობის უფლების მიღება კომპანიის განაცხადის საფუძველზე, სამუშაო ვიზის წინასწარი მიღების გარეშე.
უკვე დასაქმებული მოქალაქეები ვადის გასვლის შემდეგ კონტრაქტების გაგრძელებას ვეღარ შეძლებენ.