თბილისი, 17 ნოემბერი — Sputnik. მაკა ბოჭორიშვილი, საქართველოს საგარეო საქმეთა მინისტრის რანგში, ისრაელის სახელმწიფოში პირველ ოფიციალურ ვიზიტს მართავს. ამის შესახებ ინფორმაციას საქართველოს საგარეო საქმეთა სამინისტრო ავრცელებს.
უწყების ცნობით, ორდღიანი ვიზიტის ფარგლებში ბოჭორიშვილი შეხვედრებს გამართავს ისრაელის სახელმწიფოს საგარეო საქმეთა მინისტრ გიდეონ საართან, ქნესეთის სპიკერ ამირ ოხანასთან, ეროვნული უსაფრთხოების მინისტრ იტამარ ბენ-გვირისთან და სოფლის მეურნეობისა და სასურსათო უსაფრთხოების მინისტრ ავი დიხტერთან.
ვიზიტის ფარგლებში საქართველოს საგარეო საქმეთა მინისტრი იერუსალიმის მართლმადიდებლურ საპატრიარქოს ეწვევა და იერუსალიმის პატრიარქს, მის უწმინდესობა თეოფილე III-ს შეხვდება.
მაკა ბოჭორიშვილი იერუსალიმში ჰოლოკოსტის მსხვერპლთა მემორიალს „იად ვაშემი“ გვირგვინით შეამკობს.
საქართველომ და ისრაელმა დიპლომატიური ურთიერთობები 1992 წლის 1 ივნისს დაამყარეს. ქვეყნები აწარმოებენ მუდმივ პოლიტიკურ დიალოგს, თანამშრომლობენ ვაჭრობის, ეკონომიკის, კულტურის, განათლების, ტურიზმის სფეროებში.