თბილისი, 16 სექტემბერი — Sputnik. საქართველოს პროკურატურამ მკლავჭიდელ ხატია ვიბლიანს არასრულწლოვნის მიმართ განხორციელებულ ძალადობის ფაქტზე ბრალდება წარუდგინა, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ მიმდინარე წლის 11 სექტემბერს თბილისში, ერთ-ერთ მაღაზიაში ბრალდებულმა ფიზიკური შეურაცხყოფა მიაყენა არასრულწლოვანს, შემდეგ კი მაღაზიის მიმდებარედ გააგრძელა მასზე ფიზიკური ძალადობა.
ვიდეო, თუ როგორ უსწორდება ვიბლიანი ფიზიკურად 14 წლის არასრულწლოვანს თავისი მცირეწლოვანი შვილის თვალწინ, სოციალურ ქსელშიც გავრცელდა. გავრცელებული ინფორმაციით, სპორტსმენს ნერვებმა მას შემდეგ უმტყუნა, რაც მოზარდმა მას ერთ-ერთ სუპერმარკეტში შენიშვნა მისცა.
მკლავჭიდელს ბრალდება სსკ-ის 126-ე მუხლით (ცემა, რამაც დაზარალებულის ფიზიკური ტკივილი გამოიწვია, მაგრამ არ მოჰყოლია სისხლის სამართლის კოდექსის 120-ე მუხლით გათვალისწინებული შედეგი, ჩადენილი წინასწარი შეცნობით არასრულწლოვნის მიმართ) წარედგინა.
პროკურატურა ბრალდებულის მიმართ აღკვეთის ღონისძიების გამოყენებაზე სასამართლოს შუამდგომლობით კანონით დადგენილ ვადაში მიმართავს.