თბილისი, 16 სექტემბერი — Sputnik. საჯარო მოხელეებს, სახელმწიფო საწარმოების თანამშრომლებსა და პოლიტიკური თანამდებობის პირებს იმ შემთხვევაში, თუ მათ ფინანსურ და სამოხელეო დანაშაულებში დამნაშავედ ცნობენ, ვალდებულება ექნებათ 30 წლის განმავლობაში წარადგინონ ქონებრივი მდგომარეობის შესახებ დეკლარაცია, განაცხადა საპარლამენტო უმრავლესობის ლიდერმა ირაკლი კირცხალიამ.
როგორც კირცხალიამ განმარტა, პარლამენტმა მოამზადა ახალი საკანონმდებლო ინიციატივა, რომლის თანახმადაც, „კორუფციის წინააღმდეგ ბრძოლის შესახებ“ საქართველოს კანონში ცვლილებები შევა - პროექტი ბიუროზე მალე დარეგისტრირდება და შემდეგ მას პარლამენტის სხდომაზე განიხილავენ.
„ცვლილებების ძალაში შესვლის შემდეგ კონკრეტულ სამოხელეო დანაშაულში მხილებული ადამიანების ქონებრივი მდგომარეობის აქტიური დაკვირვება და მონიტორინგი 30 წლის განმავლობაში გახდება შესაძლებელი, რაც ფაქტობრივად გამორიცხავს მათ მიერ მითვისებული ქონების ლეგალიზაციას და პირადი ინტერესებისთვის მის გამოყენებას სასჯელის მოხდის შემდეგაც კი“, - განაცხადა კირცხალიამ.
როგორც მან აღნიშნა, სიახლე ქვეყანას შესაძლებლობას მისცემს კორუფციის სიმცირის მაჩვენებლით მსოფლიო ქვეყნების სამეულში შევიდეს.
გასულ კვირაში საქართველოში გახმაურებული კორუფციული სკანდალი გამოაშკარავდა, რომლის მთავარი ფიგურანტიც ყოფილი თავდაცვის მინისტრი ჯუანშერ ბურჭულაძეა. მას ბრალად ედება სახელმწიფო-პოლიტიკური თანამდებობის მქონე პირის მიერ სამსახურებრივი უფლებამოსილების ბოროტად გამოყენება და უკანონო შემოსავლის ლეგალიზაცია. კერძოდ, საგამოძიებო უწყება ექს-მინისტრს ედავება სახელმწიფო სახსრების გაფლანგვა და 2023 წელს სამხედრო ჰოსპიტლისთვის მაგნიტურ-რეზონანსული ტომოგრაფიის აპარატის შეძენისას 1,3 მლნ ლარის გათეთრება. ამავე საქმეზე დაკავებულია მისი მოადგილე და თავდაცვის სამინისტროს შესყიდვების დეპარტამენტის ყოფილი უფროსი.
მანამდე, 21 ივნისს, სახელმწიფო უსაფრთხოების სამსახურმა დააკავა რომეო მიქაუტაძე, რომელსაც ეკონომიკის მინისტრის მოადგილის თანამდებობა 2017 წლის ოქტომბრიდან 2024 წლის თებერვლამდე ეკავა, სამსახურებრივი უფლებამოსილები ბოროტად გამოყენებისა და მილიონობით ლარის უკანონო შემოსავლების ლეგალიზაციის ბრალდებით დააკავეს. მას 2.2 მილიონი ლარის გათეთრებაში ადანაშაულებენ.