მსოფლიო ჩემპიონატის შესარჩევი ეტაპი ფეხბურთში: საქართველოს ნაკრები ჯგუფში მეორე ადგილზეა

თბილისი, 8 სექტემბერი — Sputnik. 2026 წლის მსოფლიო ჩემპიონატის საკვალიფიკაციო ეტაპის მეორე ტურში თურქეთის ნაკრებმა ესპანეთს უმასპინძლა და ანგარიშით 0:6 დამარცხდა.

გუშინ, საქართველოს ნაკრებმა ბულგარეთთან შეხვედრა გამართა და ანგარიშით 3:0 დაამარცხა. შეხვედრა „დინამო არენაზე" ჩატარდა, სადაც 4 სექტემბერს საქართველოს ნაკრებმა პირველი ტურში მატჩი თურქეთთან ანგარიშით 2:3 წააგო.

საკვალიფიკაციო ეტაპზე საქართველოს ნაკრები E ჯგუფში თურქეთის, ესპანეთის და ბულგარეთის გუნდებთან ერთად ასპარეზობს.

სექტემბრის ორი ტურის შემდეგ 6 ქულით ესპანეთი ჯგუფის ერთპიროვნული ლიდერია. საქართველოსა და თურქეთს 3-3 ქულა აქვთ, მაგრამ ბურთების უკეთესი სხვაობით (საქართველო - 5:3, თურქეთი - 3:8) მეორე ადგილზე „ჯვაროსნები“ არიან.

6-ტურიან საკვალიფიკაციო ეტაპზე, თითოეულ ქულას დიდი მნიშვნელობა მიენიჭება. ჯგუფში პირველადგილოსანი გუნდი კანადაში, მექსიკასა და აშშ-ში გასამართი მსოფლიო ჩემპიონატის საგზურს ავტომატურად მოიპოვებს. მეორეადგილოსანი კი მუნდიალისთვის ბრძოლას პლეი-ოფის ეტაპზე გააგრძელებს.

11 ოქტომბერი, ესპანეთი - საქართველო,

14 ოქტომბერი, თურქეთი - საქართველო,

15 ნოემბერი, საქართველო - ესპანეთი,

18 ნოემბერი, ბულგარეთი - საქართველო.

მსოფლიო ჩემპიონატის ფინალური მატჩები 2026 წლის 11 ივნისიდან 19 ივლისის პერიოდში აშშ-ის, მექსიკისა და კანადის 16 ქალაქში გაიმართება.