თბილისი, 21 აგვისტო — Sputnik. სამართალდამცველებმა მარნეულში ჯგუფურად ჩადენილი ძალადობისა და თავისუფლების უკანონო აღკვეთის ბრალდებით სამი პირი დააკავეს, ნათქვამია შსს-ს მიერ გავრცელებულ განცხადებაში.
უწყების ცნობით, დაკავებულთა ასაკი 23-დან 31 წლამდეა. შემთხვევა მარნეულის რაიონის ერთ-ერთ სოფელში მოხდა. გამოძიების ინფორმაციით, ბრალდებულები ფინანსური დავის გამო 34 წლის პირს ფიზიკურად გაუსწორდნენ, ძალის გამოყენებით ჩასვეს ავტომანქანის საბარგულში, უკანონოდ აღუკვეთეს თავისუფლება და ერთ-ერთი მდინარის მიმართულებით წაიყვანეს, რა დროსაც მან შეძლო საბარგულის გახსნა და გაქცევა.
შსს-ს ცნობით, სამართალდამცველებმა ჩატარებული სამძებრო და საგამოძიებო ღონისძიებების შედეგად სამივე ბრალდებული ცხელ კვალზე დააკავეს.
გამოძიება საქართველოს სსკ-ის 126-ე და 143-ე მუხლებით მიმდინარეობს. დანაშაული 7-დან 10 წლამდე ვადით თავისუფლების აღკვეთას ითვალისწინებს.