თბილისი, 19 ივლისი — Sputnik. მიმდინარე წლის ექვს თვეში ევროკავშირის ქვეყნებიდან საქართველოს 1860 მოქალაქის დეპორტაცია მოხდა, აქედან 9 პირის მიღებაზე საქართველომ რეადმისიის შესახებ შეთანხმების ფარგლებში უარი განაცხადა, აღნიშნულია საქართველოს შინაგან საქმეთა სამინისტროს ვებ-გვერდზე სტატისტიკურ მონაცემებში.
დეპორტირებულთაგან 1065 მამაკაცია და 312 ქალი.
ყველაზე მეტი მოქალაქის დეპორტაცია (966 ადამიანი) განხორციელდა გერმანიიდან. ამავე პერიოდში საფრანგეთიდან დეპორტირებულია საქართველოს 371 მოქალაქე. მესამე ადგილზეა ირლანდია – 179 ადამიანი, შემდეგ მოდის შვეიცარია (63) და საბერძნეთი (69).
შსს-ს ცნობით, საქართველოს ხელისუფლებამ ცხრა დეპორტირებულს რეადმისიის შეთანხმების საფუძველზე სამშობლოში დაბრუნების უფლება არ მისცა. მათი დეპორტაცია გერმანიიდან, საბერზნეთიდან, იტალიიდან, პოლონეთიდან და საფრანგეთიდან იგეგმებოდა.
ევროკავშირის ქვეყნებთან საქართველოს მოქალაქეებისთვის უვიზო რეჟიმი 2017 წლის 28 მარტიდან ამოქმედდა. საუბარია შენგენის ზონის ქვეყნებში მოკლევადიან (180 დღის მანძილზე საერთო ჯამში 90 დღით) ტურისტულ, საქმიან და სტუმრის სტატუსით ვიზიტებზე.
საქართველოს მოქალაქეების დეპორტაცია ქვეყნის მიერ „უნებართვოდ მცხოვრებ პირთა რეადმისიის შესახებ“ გაფორმებული შეთანხმებების ფარგლებში ხორციელდება. საქართველოს ხელისუფლებამ არაერთხელ მოუწოდა საკუთარ მოქალაქეებს, დაიცვან ევროკავშირის ქვეყნებში ყოფნის წესები, რადგან მათი დარღვევა უვიზო რეჟიმს საფრთხეს უქმნის.
ქვეყანამ გაატარა რიგი ზომები იმისთვის, რათა არ დაუშვას სხვა ქვეყნებში არალეგალური მიგრაცია. კერძოდ, გაამკაცრა კანონმდებლობა ევროკავშირის ქვეყნებთან უვიზო რეჟიმის დამრღვევთა წინააღმდეგ, მაგალითად, რეადმისიასთან დაკავშირებული ყველა ხარჯი თავად კონკრეტულ პირს ეკისრება.
ასევე გამკაცრდა გვარის გამოცვლის პროცედურები, რაც ხშირად სწორედ ამ პროცესთან იყო დაკავშირებული.