ფილმის ერთერთი თბილი ეპიზოდი უკავშირდება ძაღლს სახელად „ზარბაზანა“, რომელიც მუდმივად დაჰყვებოდა მთავარ პერსონაჟს, ვალიკო მიზანდარს და მასთან ერთად ვერტმფრენშიც კი ჯდებოდა.
თავდაპირველად ეს როლი ერგო პატარა ძაღლს სახელად ჩაპა, რომელიც სპეციალურად მოსკოვიდან ჩამოიყვანეს. მაგრამ ის ძალიან მოვლილი იყო და რეჟისორს გიორგი დანელიას ეს არ მოეწონა.
გადასაღები მოედნისკენ მიმავალ გზაზე დანელიამ შენიშნა მიუსაფარი ძაღლი - ეკალ-ბარდში, ჭუჭყიანი, ცალყურჩამოგდებული, მაგრამ ის ძალიან ამაყად დაიარებოდა, რამაც რეჟისორზე დიდი შთაბეჭდილება მოახდინა.
ძაღლი მაშინვე აიყვანეს და მან ჩაპას ნაცვლად როლი მიიღო. სანამ ფიქრობდნენ, როგორ მოეშინაურებინათ ძაღლი და ბრძანებები ესწავლათ, ვახტანგ კიკაბიძემ ეს საკუთარ თავზე აიღო.
მას ჯიბეში სულ თან დაჰქონდა ძეხვის ნაჭრები და ძაღლი ყველაფერს უჯერებდა. როდესაც კამერა ირთვებოდა, კიკაბიძეს ხელში ძეხვი ეჭირა და ძაღლი უკან მიყვებოდა. ის უშიშრად ადიოდა ვერტმფრენში, იხედებოდა ილუმინატორში, ჯდებოდა, წვებოდა და საერთოდ სანიმუშოდ იქცეოდა. გადაღებების დროს ზარბაზანა მოსკოვშიც კი წაიყვანეს, სადაც ის ერთ-ერთ ეპიზოდში მონაწილეობდა.