თბილისი, 20 ივნისი — Sputnik. საგანგებო სიტუაციების მართვის სამსახურმა კახეთში მარცვლეულის აღების პროცესში მინდვრის ხანძრების პრევენციის და სწრაფი რეაგირების მიზნით საველე ოპერაციების შტაბი გახსნა, ნათქვამია უწყების მიერ გავრცელებულ განცხადებაში.
უწყების ცნობით, დედოფლისწყაროსა და სიღნაღის მუნიციპალიტეტებში სპეცტექნიკისა და ცოცხალი ძალის მობილიზება მოხდა. ხანძრების პრევენციის მიზნით, აღნიშნულ ტერიტორიაზე მონიტორინგი დრონების მეშვეობით განხორციელდება.
საგანგებო სიტუაციების მართვის სამსახურისთვის ტყისა და მინდვრის ხანძრების პრევენცია და დროული რეაგირება ერთ-ერთი პრიორიტეტული მიმართულებაა. ზაფხულის სეზონზე ტყისა და მინდვრის ხანძრების გაჩენის რისკი იზრდება, რაც ხშირად გამოწვეულია მოქალაქეების მიერ სასოფლო-სამეურნეო მიწებზე ცეცხლის დანთებით და დაუდევრობით.
საგანგებო სიტუაციების მართვის სამსახური მოუწოდებს მოსახლეობას, გამოიჩინონ მაღალი სამოქალაქო პასუხისმგებლობა, არ დაანთონ ცეცხლი სასოფლო სამეურნეო სავარგულებზე, ტყის ან ველის სიახლოვეს და ცეცხლის კერები უყურადღებოდ არ დატოვონ. დაკვამლიანების ან ცეცხლის შემჩნევის შემთხვევაში კი დაუყოვნებლივ აცნობონ შინაგან საქმეთა სამინისტროს საზოგადოებრივი უსაფრთხოების მართვის ცენტრ 112-ს.