თბილისი, 22 აპრილი — Sputnik. ქართველი რეჟისორი, მხატვარი და ანიმატორი დავით (თეიმურაზ) სიხარულიძე 71 წლის ასაკში გარდაიცვალა. ამის შესახებ ინფორმაციას საქართველოს ეროვნული კინოცენტრი ავრცელებს.
„საქართველოს კინემატოგრაფიის ეროვნული ცენტრი მწუხარებას გამოთქვამს დავით სიხარულიძის გარდაცვალების გამო და იზიარებს ოჯახის მწუხარებას“, – ნათქვამია განცხადებაში.
დავით სიხარულიძემ თბილისის სამხატვრო აკადემიის დეკორატიულ-გამოყენებითი ხელოვნების ფაკულტეტი დაამთავრა, მოგვიანებით კი - საქართველოს შოთა რუსთაველის სახელობის სახელმწიფო თეატრალური ინსტიტუტის კინოსარეჟისორო ფაკულტეტი (მულტიპლიკაციური კინოს რეჟისორის სპეციალობით).
1995-1996 წლებში მან სტაჟირება გაიარა აშშ-ში, კინოფილმებისა და ტელეგადაცემის ამერიკულ მწარმოებელ კომპანია Warner Bros.-ში. იყო საკავშირო და საერთაშორისო კინოფესტივალების ლაურეატი. კანის კინოფესტივალზე (1984) ოქროს პალმის რტოთი დაჯილდოვდა ანიმაციური ფილმისთვის „ჭირი“.
დავით სიხარულიძე იყო საქართველოს შოთა რუსთაველის თეატრისა და კინოს სახელმწიფო უნივერსიტეტის ასოცირებული პროფესორი.
დავით სიხარულიძეს ეკუთვნის ფილმები „ეფემერა“, „ჭირი“, „გულუბრყვილო ბატი ტასიკოს თავგადასავალი“, „იაკობ გოგებაშვილი. ცხოვრება და მოღვაწეობა“, „გავარდნილები“, და ანიმაციური ფილმი „ცრუპენტელა აღმზრდელი“.