თბილისი, 4 აპრილი — Sputnik. საქართველოს რეგიონული განვითარების მინისტრის თანამდებობას კახაბერ გულედანი დაიკავებს. ამის შესახებ საქართველოს პრემიერ-მინისტრმა ირაკლი კობახიძემ დღევანდელ ბრიფინგზე განაცხადა.
რამდენიმე დღის წინ ცნობილი გახდა, რომ რეგიონული განვითარების მინისტრის პორტფელი გრიგოლ ლილუაშვილს უნდა ჩაებარებინა, თუმცა, როგორც ირაკლი კობახიძემ განაცხადა, გაირკვა, რომ სამინისტროს მუშაობაზე განსხვავებული მიდგომები არსებობდა.
„გასული დღეების განმავლობაში გვქონდა კონსულტაციები გრიგოლ ლილუაშვილთან და გაირკვა, რომ ჰქონდა განსხვავებული მიდგომები სამინისტროს საქმიანობის პრინციპებთან, მათ შორის, სამინისტროში გასატარებელ საკადრო პოლიტიკასთან დაკავშირებით. აქედან გამომდინარე, მივიღეთ გადაწყვეტილება, რომ გრიგოლ ლილუაშვილი აღარ დაიკავებს რეგიონული განვითარების მინისტრის თანამდებობას. ამ გადაწყვეტილებამდე მივედით ჩვენ ერთობლივად", - განაცახადა კობახიძემ.
კობახიძემ გულედანს საქართველოს რეგიონული განვითარების მინისტრის თანამდებობაზე წარმატება უსურვა.
კახაბერ გულედანი წლების განმავლობაში ის მუშაობდა ჯერ კერძო სექტორში, 2016-2017 წლებში კი იკავებდა საქართველოს რეგიონული განვითარებისა და ინფრასტრუქტურის მინისტრის მოადგილის თანამდებობას. მოგვიანებით იყო სამგორის რაიონის გამგებელი, ქალაქ თბილისის მუნიციპალური ინსპექციის ხელმძღვანელი.
კახა გულედანი დღემდე იკავებდა თბილისის მერის მოადგილის თანამდებობას.
რაც შეეხება გრიგოლ ლილუაშვილს, მან სახელმწიფო უსაფრთხოების სამსახური (სუსი) უფროსის თანამდებობა რამდენიმე დღის წინ დატოვა. სუსის ხელმძღვანელად იუსტიციის ყოფილი მინისტრი, ანრი ოხანაშვილი დაინიშნა.