რამდენი ტვირთი გადაამუშავეს საქართველოს ნავსადგურებმა - ახალი სტატისტიკა

თბილისი, 12 მარტი — Sputnik. საქართველოს პორტებმა და ტერმინალებმა 2024 წელს 15,6 მილიონი ტონა ტვირთი გადაამუშავეს, რაც 5,8%-ით მეტია 2023 წლის ანალოგიურ პერიოდთან შედარებით, ნათქვამია სტატისტიკის ეროვნული სამსახურის „საქსტატის" ვებგვერდზე განთავსებული მასალების შესახებ.

უწყების ცნობით, გადამუშავებული ტვირთების 45,7% გენერალური ტვირთია, 33,6% – თხევადი, 20,7% კი – ნაყარი ტვირთი.

გასულ წელს საქართველოს ნავსადგურებსა და ტერმინალებში შემოვიდა 168 გემი, რომელთა 38,5% გენერალური ტვირთის გადამზიდია, 30,1% – თხევადი ტვირთმზიდი, 22,5% – კონტეინერმზიდი, ხოლო 8,9% ნაყარ ტვირთმზიდებზე, სპეციალიზებულ გემებზე და ბუქსირებზე ნაწილდება.

ამ პერიოდში საქართველოს ნავსადგურებმა და ტერმინალებმა მიიღეს 34%-ით მეტი სპეციალიზებული გემები, 15,9%-ით მეტი გენერალური (ზოგადი სახის) ტვირთმზიდი, 6,7%-ით მეტი თხევადი ტვირთმზიდი და 14,1%-ით ნაკლები კონტეინერმზიდი და 9,2%-ით ნაკლები თხევადი ტვირთმზიდი.

ამასთან, 2024 წელს პორტებსა და ტერმინალებში შემოსული გემების 18,4% თურქეთის დროშით დაცურავდა, 16,1% – პანამის, 9,6% - მალტის, 8,7% – ლიბერიის, 5,2% - რუსეთის ხოლო 42% სხვა ქვეყნებზე გადანაწილდა.

2024 წელს საქართველოს ნავსადგურები 7,9 ათას მგზავრს მოემსახურა, რაც 2,4%-ით მეტია 2023 წლის მაჩვენებელზე. ამასთან, მგზავრნაკადში ქვეყანაში შემოსული მგზავრების წილმა გადააჭარბა გასული მგზავრების წილს და 51% შეადგინა.

საქართველოში ამჟამად ორი – ბათუმისა და ფოთის ნავსადგური მუშაობს. ტვირთის ძირითადი ნაკადი ფოთის პორტით გადის. ამ პორტის მინუსი მისი შედარებით მცირე სიღრმეა - ამჟამად ნავსადგურს არ შეუძლია 1,5 ათას კონტეინერზე მეტი ტევადობის გემების მიღება.