თბილისი, 3 მარტი - Sputnik. ხარაგაულის მუნიციპალიტეტში, საკრაულას ხეობაში დაკარგული მესამე მწყემსი იპოვეს, იუწყება ტელეკომპანია „რუსთავი 2".
სამი ადამიანის დაკარგვის შესახებ ინფორმაცია 28 თებერვალს გავრცელდა. მედიის ცნობით, ადგილობრივ მწყემსებს საკრაულას ხეობაში ნახირი ჰყავდათ გაყვანილი და უხვი ნალექის გამო მათთან კომუნიკაცია ვერ ხერხდებოდა. მაშველებმა დაკარგულების სამძებრო სამუშაოები იმავე დღესვე დაიწყეს.
მაშველებმა სამი მწყემსიდან ორის ადგილსამყოფელი გუშინ დაადგინეს, მესამე პირის სამძებრო ოპერაცია ამ დრომდე გრძელდებოდა.
მუნიციპალიტეტის მერიის ინფორმაციით, თავდაცვის ძალების და საგანგებო სიტუაციების მართვის სამსახურის მიერ სპეციალური დრონებით ხდებოდა ხეობის დათვალიერება და სწორედ, მათ მიერ მოხდა პირის ადგილსამყოფლის დადგენა.