თბილისი, 20 თებერვალი — Sputnik. მზია ამაღლობელს, რომელმაც დაპატიმრების შემდეგ პროტესტის ნიშად 38 დღე იშიმშილა, კვების აღსადგენად ექიმები გარკვეული კალორაჟის საკვებს აძლევენ, განაცხადა კლინიკა „ვივამედის“ კლინიკურმა დირექტორმა ზურაბ ჩხაიძემ ჟურნალისტებთან.
მზია ამაღლობელი 11 იანვრის საღამოს ბათუმში, პოლიციის მთავარ სამმართველოსთან საპროტესტო აქციის დროს ადმინისტრაციული წესით დააკავეს, დაახლოებით ორ საათში ის ხელწერილის საფუძველზე სამ პირთან ერთად გაათავისუფლეს. გათავისუფლებიდან რამდენიმე წუთში კი ამაღლობელმა ბათუმის პოლიციის უფროს ირაკლი დგებუაძეს სილა გააწნა, რის შემდეგაც იგი ხელმეორედ დააკავეს. დაკავების პროტესტის ნიშნად ამაღლობელმა შიმშილობა დაიწყო. მან შიმშილობა 18 თებერვალს შეწყვიტა.
ამაღლობელი გართულებული ჯანმრთელობის მდგომარეობის გამო სასჯელაღსრულების დაწესებულებიდან კლინიკა „ვივამედში" გამოკვლევებისთვის 4 თებერვალს გადაიყვანეს. ის ამ დროისთვის კვლავ კლინიკა „ვივამედში“ იმყოფება და მკურნალობას აგრძელებს.
„დავიწყეთ კვების აღდგენის პროცესი. ვხელმძღვანელობთ შესაბამისი ე.წ. რეფიდინგ-პროტოკოლით. მას ეძლევა გარკვეული კალორაჟის საკვები, კვების აღდგენის პროცესი ყოველგვარი გართულების გარეშე მიმდინარეობს“, - განაცხადა ჩხაიძემ.
ამაღლობელს ბრალი სსკ-ის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს, დანაშაული ოთხიდან შვიდ წლამდე ვადით თავისუფლების აღკვეთას ითვალისწინებს.
21 იანვარს ქუთაისის სააპელაციო სასამართლომ ოპოზიციური ინტერნეტ-გამოცემების დამფუძნებლის საქმეზე აღკვეთის ღონისძიების სახით შეფარდებული პატიმრობის შესახებ შესული საჩივარი დაუშვებლად ცნო.
ამაღლობელისთვის აღკვეთის ღონისძიების გადასინჯვაზე 14 თებერვალს უარი თქვა ბათუმის საქალაქო სასამართლომ. 19 თებერვალს ჟურნალისტის ადვოკატებმა ქუთაისის სააპელაციო სასამართლოში სწორედ აღნიშნული გადაწყვეტილება გაასაჩივრეს. თუმცა სააპელაციო სასამართლომ მზია ამაღლობელისთვის აღკვეთის ღონისძიების შეცვლის თაობაზე ადვოკატთა საჩივარი წარმოებაში კვლავ არ მიიღო.
მზია ამაღლობელის პატიმრობიდან გათავისუფლების მოთხოვნით თბილისში, ბათუმსა და ქუთაისში პერმანენტული საპროტესტო აქციები იმართებოდა.