თბილისი, 18 დეკემბერი — Sputnik. სამართალდამცველებმა მაღაზია „არტ-თაიმის“ გაქურდვის საქმეზე 33 წლის მამაკაცი დააკავეს, ნათქვამია შინაგან საქმეთა სამინისტროს მიერ გავრცელებულ ინფორმაციაში.
გამოძიებით დადგინდა, რომ ბრალდებულმა მიმდინარე წლის 12 დეკემბერს, თბილისში, ჭავჭავაძის გამზირზე მდებარე მაღაზია „არტ-თაიმის" შუშის კარი დააზიანა, ობიექტში უკანონოდ შევიდა და საათები მოიპარა.
სამართალდამცველებმა ბრალდებული გორში დააკავეს - ნაქურდალი საათების ნაწილი ამოღებულია ნივთმტკიცებად.
გამოძიება სსკ-ის 177-ე მუხლის მე-2 ნაწილის „ა“ და „ბ“ ქვეპუნქტებით მიმდინარეობს, რაც გულისხმობს სადგომში ან საცავში შეღწევით ჩადენილ ქურდობას, რამაც მნიშვნელოვანი ზიანი გამოიწვია.
დანაშაული 5-წლამდე ვადით თავისუფლების აღკვეთას ითვალისწინებს.