თბილისი, 11 ნოემბერი — Sputnik. საქართველოს ეროვნული ბანკი ფინანსურ სექტორში ქმნის ინკლუზიურ გარემოს, რათა ლიდერი ქალებისთვის ახალი შესაძლებლობები გაიხსნას, განაცხადა ეროვნული ბანკის პრეზიდენტის მოვალეობის შემსრულებელმა ნათია თურნავამ ღონისძიებაზე „ბუღალტერთა სამიტი 2024 - ძლიერი ქალები ფინანსებში“.
თურნავამ სიტყვით გამოსვლისას ფინანსურ სექტორში ლიდერი ქალებისთვის არსებულ შესაძლებლობებსა და არსებულ გამოწვევებზე ისაუბრა. მან ასევე ყურადღება გაამახვილა იმ რეგულაციებსა და სტრატეგიულ ნაბიჯებზე, რაც ქალების წახალისებისა და გაძლიერების მიზნით დაინერგა.
„ეროვნული ბანკის მიერ მიღებული ზომები მიმართულია სექტორში უსაფრთხო გარემოს შექმნისკენ, სადაც ნიჭი, პოტენციალი და შრომა დაფასებულია სქესის მიუხედავად", - განაცხადა თურნავამ.
მისი თქმით, მიზნობრივი რეგულაციების დანერგვით, პროფესიონალიზმის განვითარების მხარდაჭერითა და ინკლუზიური ხელმძღვანელობის წახალისებით ეროვნული ბანკი მიზნად ისახავს, რომ აღმოიფხვრას არსებული ბარიერები და ქალი-ლიდერებისთვის გაჩნდეს უფრო მეტი შესაძლებლობები.
როგორც თურნავამ აღნიშნა, ეროვნული ბანკის ხელმძღვანელობას სჯერა, რომ მრავალფეროვანი და თანაბარუფლებიანი ფინანსური სექტორი არამარტო გააძლიერებს ქვეყნის ეკონომიკას, არამედ ხელს შეუწყობს ინოვაციასა და მდგრადობას ყველა დონეზე.
ეროვნული ბანკი მუდმივ რეჟიმში განაგრძობს საუკეთესო საერთაშორისო პრაქტიკის თვალყურის დევნას და თავისი კომპეტენციის ფარგლებში ნაბიჯების გადადგმას ინკლუზიური გარემოს შესაქმნელად, დასძინა თურნავამ.
„ბუღალტერთა სამიტი 2024 - ძლიერი ქალები ფინანსებში“ გენდერული თანასწორობის მუდმივმოქმედი საპარლამენტო საბჭოსა და ბუღალტერთა კავშირის თანაორგანიზებით გაიმართა. ღონისძიებაში მონაწილეობდნენ პარლამენტის ვიცე-სპიკერი ნინო წილოსანი და ფინანსთა მინისტრის მოადგილე ეკატერინე გუნცაძე.