იაგო ხვიჩია: ოთხი ოპოზიციური პარტია უნამუსოდ იტყუება

თბილისი, 7 ნოემბერი – Sputnik. ოთხი ოპოზიციური პარტია, რომლებმაც 26 ოქტომბრის არჩევნებში 5%-იანი ბარიერი გადალახეს, კვაზი ბრძოლას აწარმოებენ და უნამუსოდ იტყუებიან, თითქოს არ სურთ პარლამენტში შესვლა, განუცხადა ჟურნალისტებს ოპოზიციური პარტია „გირჩის“ ერთ-ერთმა ლიდერმა იაგო ხვიჩიამ.

პარლამენტში შესული ყველა ოპოზიციური პარტია და საქართველოს პრეზიდენტი სალომე ზურაბიშვილი უარს ამბობენ მმართველი პარტია „ქართული ოცნების“ გამარჯვების აღიარებაზე და ამტკიცებენ, რომ არჩევნები ტოტალურად გაყალბდა. ოპოზიცია პერმანენტულ საპროტესტო აქციებს მართავს, და ეს აქციები შესაძლოა ყოველდღიურობად იქცეს.

დეპუტატის თქმით, სამართლებრივი ტერმინების გამოყენებით შეიძლება ითქვას, რომ ოპოზიცია არასწორი მოთხოვნით დავობს სასამართლოში და ამ დავაში სხვა პარტიების ჩართვა შეცდომა არის.

„ჩვენი მოსამართლე ახლა ხალხია და მე ჯერჯერობით ვეუბნები, რომ ამ დანარჩენ გიჟ ოპოზიციასთან არ ვარ, ისინი ერთად არიან, მე სხვაგან ვარ“, - განაცხადა ხვიჩიამ.

პარტია „გირჩმა“ კენჭისყრის შედეგად ვერ გადალახა 5%-იანი ბარიერი და პარლამენტის მიღმა დარჩა - 2,9% (62 223 ხმა).

საქართველოში საპარლამენტო არჩევნები 26 ოქტომბერს ჩატარდა.

არჩევნების შედეგად პარლამენტში მოხვდნენ ოპოზიციური კოალიციები „ერთიანობა - ნაციონალური მოძრაობა" („ერთიანი ნაციონალური მოძრაობა", „სტრატეგია აღმაშენებელი", „ევროპული საქართველო"), „ძლიერი საქართველო" („ლელო საქართველოსთვის", „ხალხისთვის", „თავისუფლების მოედანი", „მოქალაქეები"), „კოალიცია ცვლილებისთვის" („ახალი", „გირჩი - მეტი თავისუფლება", „დროა") და პარტია „საქართველოსთვის".

ამ დროისთვის საქართველოს პროკურატურა, შსს და სპეციალური საგამოძიებო სამსახური წინასაარჩევნო პერიოდში და კენჭისყრის დღეს ჩადენილ სავარაუდო დანაშაულზე 47 სისხლის სამართლის საქმეს იძიებენ.

გამოძიება ცენტრალური საარჩევნო კომისიის, მმართველი და ოპოზიციური პარტიების, არასამთავრობო ორგანიზაციების მიმართვისა და მედიაში გავრცელებული ინფორმაციის საფუძველზე დაიწყო. ოპოზიციონერებმა, არასამთავრობო ორგანიზაციებმა და პრეზიდენტმა, რომლებმაც არჩევნები ტოტალურად გაყალბებულად გამოაცხადეს, უარი განაცხადეს გამოძიებასთან თანამშრომლობაზე.

ხელისუფლება გაყალბებასთან დაკავშირებულ ყველა ბრალდებას დეზინფორმაციას უწოდებს. „ქართული ოცნების“ ლიდერები ყოველდღიურად მართავენ ბრიფინგებს და კომენტარს აკეთებენ თითოეულ ბრალდებაზე. პარლამენტის თავმჯდომარის, შალვა პაპუაშვილის განცხადებით, ადგილი აქვს არჩევნების გაყალბების ფსევდომტკიცებულებების გაყალბებას.

საქართველოში საპარლამენტო არჩევნები პირველად ჩატარდა მხოლოდ პროპორციული სისტემით (პარტიული სიებით) და ფართო მასშტაბით ელექტრონული ტექნოლოგიების - ვერიფიკაციის და ხმის მთვლელი აპარატების გამოყენებით. ვერიფიკაციის აპარატში მოწმდებოდა პირადობის მოწმობა, ხოლო ხმის მთვლელ აპარატში ბიულეტენი თავსდება.