პაპუაშვილი: არჩევნების გაყალბების ფსევდომტკიცებულებების ფაბრიკაცია მიმდინარეობს

თბილისი, 29 ოქტომბერი — Sputnik. საპარლამენტო არჩევნები საქართველოში უპრეცედენტოდ მაღალ დონეზე ჩატარდა და ახლა გამარჯვებული მმართველი პარტია „ქართული ოცნების“ ოპონენტები გაყალბების სავარაუდო მტკიცებულებების ფაბრიკაციით არიან დაკავებული, განაცხადა პარლამენტის თავმჯდომარე შალვა პაპუაშვილმა ბრიფინგზე.

26 ოქტომბრის საპარლამენტო არჩევნებზე მმართველმა პარტია „ქართულმა ოცნებამ“ ხმების 53,93% მიიღო. ცესკოს მონაცემების აღიარებაზე უარი განაცხადა პარლამენტში შესულმა ოთხივე ოპოზიციურმა ძალამ, მათმა მხარდამჭერმა არასამთავრობო ორგანიზაციებმა და პრეზიდენტმა სალომე ზურაბიშვილმა კი არჩევნების გაყალბებაზე განაცხადეს.

მან ხაზგასმით აღნიშნა, რომ ხელისუფლებამ დიდი ძალისხმევა გასწია, რათა ოპოზიციას არჩევნების შედეგების სანდოობაზე ეჭვის საბაბი არ მისცემოდა.

მისი თქმით, ცენტრალური საარჩევნო კომისია დაკომპლექტებული იყო პროფესიონალებით, გამოყენებული იქნა ამერიკული ტექნოლოგიები, აპარატურა შეამოწმა ამერიკულმა აუდიტორულმა კომპანიამ და 3.111 უბანზე საარჩევნო პროცესს 25 ათასი დამკვირვებელი აკვირდებოდა.

„უპრეცედენტოდ მაღალ დონეზე ჩატარებული არჩევნები დასრულდა მკაფიო და ცალსახა შედეგით. ამომრჩევლების ნება ასახულია და გამოვლენილია... მოსახლეობის აბსოლუტურმა უმრავლესობამ მხარი დაუჭირა მშვიდობას, ქვეყნის სუვერენიტეტს და მდგრად განვითარებას ევროპულ გზაზე“, – განაცხადა პაპუაშვილმა.

ახლა, მისი თქმით, საზოგადოება მოწმეა ადრე დაწერილი სცენარის განხორციელების - იწერება საჩივრები არჩევნებზე სავარაუდო დარღვევებზე, რომელთაც თან ახლავს ყოველგვარ კრიტიკულ შეფასებას მოკლებული ფოტო ან ვიდეომასალა.

„ფსევდომტკიცებულებების ეს ფაბრიკაცია სურთ გამოიყენონ იმ აღქმის შესაქმნელად, თითქოს, მათ გააჩნიათ რაიმე რეალური საბუთები, ან თითქოსდა გაშიფრეს გაყალბების არსებული სქემები“, - აღნიშნა პაპუაშვილმა.

პარლამენტის სპიკერის განმარტებით, კრიტიკოსების გეგმებშია საპროტესტო ტალღის განვითარება და ქვეყანაში ხელოვნური კრიზისის შექმნა.

„გასული წლების გამოცდილებიდან გამომდინარე, ძნელი მისახვედრი არ არის, თუ როგორ გაგრძელდება პროცესი, რომელიც გათვლილია ყველა შესაძლო საშუალებების პროტესტის ისეთი ტალღის გამოწვევა, რომ დაიკარგოს ყველა რაციონალური აზრი თუ მტკიცებულება, რათა შეიქმნას ახალი ხელოვნური კრიზისი იმიტირებული სენტიმენტებით“, - განაცხადა პაპუაშვილმა.

მან ხაზგასმით აღნიშნა, რომ „ქართული ოცნება" გამოავლენს ყველა იმ ყალბ მტკიცებულებას, რომლითაც ისინი, ვინც არ ეთანხმებიან არჩევნების შედეგებს, ცდილობენ მცდარი წარმოდგენების შექმნას და აღნიშნული თემით მანიპულირებას.

„ხალხის ნება გამოხატულია. თითოეული თქვენგანის ხმა დაცული იქნება... 2020 და 2021 წლების პროცესები საქართველოში აღარ განმეორდება“, - განაცხადა პაპუაშვილმა.

საქართველოში საპარლამენტო არჩევნები პირველად ჩატარდა მხოლოდ პროპორციული სისტემით (პარტიული სიებით) და ფართო მასშტაბით ელექტრონული ტექნოლოგიების - ვერიფიკაციის და ხმის მთვლელი აპარატების გამოყენებით.

პაპუაშვილმა ხაზგასმით აღნიშნა, რომ ამ აპარატურით მანიპულაციებზე საუბრობენ ისინი, ვინც არჩევნებამდე ცოტა ხნით ადრე აცხადებდა, რომ ეს შეუძლებელია, მათ შორის არის საქართველოს პრეზიდენტი სალომე ზურაბიშვილი.

კენჭისყრიდან მეორე დღეს ოპოზიციის მხარდამჭერმა ზურაბიშვილმა არჩევნების ტოტალურად გაყალბებაზე გააკეთა განცხადება. მისი თქმით, „გაყალბების გასათეთრებლად“, გამოყენებული იქნა თანამედროვე ტექნოლოგიები. ზურაბიშვილის მტკიცებით, ერთი დოკუმენტით ხმის მიცემა დაახლოებით 17-ჯერ იყო შესაძლებელი.

ბრალდებების პასუხად პარლამენტის თავმჯდომარემ აღნიშნა, რომ არჩევნებზე გამოყენებული იქნა ამერიკული აპარატურა, აუდიტი კი ამერიკულმა აუდიტორულმა კომპანია Pro V&V-მ ჩაატარა.

„ასე რომ, თუ ძალიან უნდათ, პასუხი ახლავე მოითხოვონ ამერიკელებისგან“, - განაცხადა პაპუაშვილმა.

მისი თქმით, ამ დროისთვის აუდიტის ორი ეტაპი ჩატარდა და მესამე ეტაპი მიმდინარეობს, რის შემდეგაც შედეგები გახდება ცნობილი.