რა ნაბიჯებს გადადგამს ოპოზიცია არჩევნების დისკრედიტაციისთვის? „ქართული ოცნების" განცხადება

თბილისი, 21 ოქტომბერი — Sputnik. ოპოზიციის ნაწილი 26 ოქტომბრის საპარლამენტო არჩევნების დისკრედიტაციის მიზნით კონკრეტული ნაბიჯების გადადგმას აპირებს, მათ შორის, ვერიფიკაციისა და ხმის დამთვლელი აპარატების დაზიანებას, ე.წ. კარუსელების იმიტაციას, განაცხადა „ქართული ოცნების“ აღმასრულებელმა მდივანმა მამუკა მდინარაძემ ბრიფინგზე.

საპარლამენტო არჩევნები, რომელიც განსაზღვრავს თუ ვინ მართავს საქართველოს მომდევნო ოთხი წლის განმავლობაში, 26 ოქტომბერს არის დაგეგმილი. ძირითადი ბრძოლა გაიმართება მმართველი პარტია „ქართულ ოცნებასა“ და ოპოზიციას შორის, რომელსაც მმართველი პარტიის ლიდერები კოლექტიურ „ნაციონალურ მოძრაობას“ და „რადიკალურ ოპოზიციას“ უწოდებენ, რომელიც, ხელისუფლების თქმით, ცდილობენ არიონ ვითარება საქართველოში, მოაწყონ რევოლუცია და, ძალაუფლების შეცვლის შემთხვევაში, ქვეყანა ომში ჩაითრიონ.

ოპოზიციის გეგმები საპარლამენტო არჩევნების დისკრედიტაციისთვის:

„და ეს არ არის, რა თქმა უნდა, სრული ჩამონათვალი", - აღნიშნა მდინარაძემ.

მისი თქმით, მომავალი არჩევნები ისტორიაში შევა როგორც უპრეცედენტო.

მისი თქმით, ოპოზიცია შემოიფარგლება მხოლოდ მედიაქტივობებით და მათი კამპანიის ძირითად კომპონენტს წარმოადგენს კონტენტის შექმნა ტელევიზიებისა და სოციალური ქსელებისათვის, სატელევიზიო ინტერვიუებისა და გადაცემებში მონაწილეობის სახით და ქვეყნის გარედან მათ დასახმარებლად გაკეთებული განცხადებების ტირაჟირებით და კომენტირებით.

გარდა ამისა, მოახლოებული არჩევნები უპრეცედენტოა იმ კუთხითაც, რომ ფაქტობრივ მოცემულობაზე დაყრდნობით ოპონენტებიდან ვერავინ იღებს ხმას ვერც ადმინისტრაციული რესურსის გამოყენებაზე, ვერც მოსყიდვაზე, ვერც არაკონკურენტულ საარჩევნო გარემოზე და ა.შ.

მისი თქმით, არანაკლებ მნიშვნელოვანია ბოლო სამი-ოთხი დღის განმავლობაში ორგანიზებული კამპანია, რომელშიც მთავარ როლს ჟურნალისტები ასრულებენ.

როგორც მდინარაძემ აღნიშნა, „ქართული ოცნების“ გეგმებში არჩევნებზე კანონმდებლობის ოდნავი დარღვევაც კი არ შედის.

მისი თქმით, თუ ვინმე ასეთ საკითხზე მმართველი პარტიის მომხრეებს დაუკავშირდება, ის არა მხოლოდ ხელისუფლების, არამედ ქვეყნის ბოროტის მსურველია და აქვს ერთადერთი მიზანი – ჩრდილი მიაყენოს დემოკრატიულ არჩევნებს და იზრუნოს მის არალეგიტიმურად გამოცხადებაზე.

დეპუტატმა ხაზგასმით აღნიშნა, რომ „ქართული ოცნება“ გააგრძელებს საზოგადოების ინფორმირებულობას იმის შესახებ, თუ როგორ ცდილობს „აგენტურული ოთხეული“ ფეიკ-კამპანიით დაბლოკოს უმრავლესობის ნება და გაწიროს ქვეყანა გარდაუვალი დაღუპვისთვის.

საქართველოს სახელმწიფო უსაფრთხოების სამსახურის მიერ გავრცელებული ინფორმაციის თანახმად, პოლიტიკურ წრეებთან დაკავშირებული ჯგუფები 26 ოქტომბრის არჩევნების წინა დღეებში გეგმავენ ხელოვნური ინტელექტის და სხვა ტექნოლოგიების მეშვეობით დამონტაჟებული, ფალსიფიცირებული ვიდეო- და აუდიოჩანაწერების გავრცელებას, სადაც ხელისუფლების წარმომადგენელთა ხმები და გამოსახულებები იქნება გამოყენებული. ამის მიზნად დესტაბილიზაციის კერების შექმნა დასახელდა.

სუსის ხელთ არსებული ინფორმაციით, ფალსიფიცირებულ აუდიოჩანაწერებს საზოგადოებას წარუდგენენ, როგორც სუს-იდან გაჟონილ ინფორმაციას, რაც, ერთ მხრივ, ემსახურება უწყების დისკრედიტაციას და მეორე მხრივ, შექმნის დისონანსს სახელისუფლებო უწყებებს შორის.

აღნიშნული პროვოკაციის მთავარ მიზანს ასევე წარმოადგენს საპროტესტო მუხტის ხელოვნურად შექმნა და აგორება, ქვეყანაში დესტაბილიზაციის კერების გაჩენა, რაც საბოლოოდ გამოყენებული იქნება პოლიტიკური მიზნებისთვის, ნათქვამია სუსის განცხადებაში.

როგორც უწყებაში აღნიშნეს, სახელმწიფო უსაფრთხოების სამსახური ყურადღებით აკვირდება აღნიშნული ჯგუფების საქმიანობას და ნებისმიერი კანონდარღვევის შემთხვევაში გატარებული იქნება კანონით გათვალისწინებული შესაბამისი ღონისძიებები.