თბილისი, 20 ოქტომბერი — Sputnik. თბილისში ოპოზიციისა და არასამთავრობო სექტორის მიერ ორგანიზებული მარში „საქართველო ირჩევს ევროკავშირს“ ტარდება, იუწყება „Sputnik-საქართველოს" კორესპონდენტი ადგილიდან.
მოქალაქეები, საქართველოს, უკრაინისა და ევროკავშირის დროშებით, დედაქალაქში ხუთ სხვადასხვა ლოკაციაზე 17:00 საათზე შეიკრიბნენ და 19:00 საათისთვის მსვლელობით თავისუფლების მოედნისკენ გაემართნენ.
აქციის მონაწილეებმა ევროკავშირისა და საქართველოს ჰიმნები შეასრულეს.
მარშში ოპოზიციის ლიდერები, არასამთავრობო ორგანიზაციებისა და სამოქალაქო სექტორის წარმომადგენლები მონაწილეობენ.
მარში „საქართველო ირჩევს ევროკავშირს“
© photo: Sputnik / Stringer
მმართველი პარტიის განცხადებით, კვირას გამართულ აქციაში ლგბტ-თემისა და რადიკალური ოპოზიციის წარმომადგენლები მონაწილეობენ.
დეპუტატ ირაკლი ზარქუას თქმით, ამ და სხვა მიზეზების გამო ბევრი ტოვებს ოპოზიციის რიგებს, ვინაიდან, ადათ-წესებით განთქმული ქართველი „პრაიდთან“ ერთად აქციებს ვერ ჩაატარებს.
„როგორ შეიძლება ქართველი კაცი, თავისი სტუმარ-მასპინძლობით, თავისი ადათ-წესებით განთქმული, ახლა ლგბტ-პროპაგანდასთან და მათ „პრაიდთან“ ერთად აქციას ატარებდეს? ამიტომ, ბევრი ტოვებს ოპოზიციურ პარტიებს... მადლობა მინდა ვუთხრა ორგანიზატორებს, რომ გვეხმარებიან, კიდევ ერთხელ ვაჩვენოთ საზოგადოებას განსხვავება ჩვენსა და ამ ლგბტ-საზოგადოებას შორის", - განაცხადა ზარქუამ.
ოპოზიციის მიერ ორგანიზებულ აქციას პრეზიდენტი სალომე ზურაბიშვილიც შეუერთდა.