საქართველო-უკრაინა: მატჩი პოზნანში გაიმართება

თბილისი, 11 ოქტომბერი — Sputnik. საქართველოს ეროვნული საფეხბურთო ნაკრები უეფას ერთა ლიგის B დივიზიონის მესამე ტურის მატჩში უკრაინას დაუპირისპირდება.

შეხვედრა პოლონეთში, ქალაქ პოზნანში, დღეს, 11 ოქტომბერს, თბილისის დროით 22:45 საათზე დაიწყება.

ორი ტურის შემდეგ საქართველოს ნაკრები ექვსი ქულით ჯგუფში პირველ ადგილს იკავებს. მეორე ადგილზე ალბანეთია, მესამეზე კი ჩეხეთი. B1 ჯგუფში ბოლო ადგილზე უკრაინაა, რომელსაც ჯერჯერობით ნული ქულა აქვს.

საქართველო-უკრაინის მატჩთან დაკავშირებით ქართველი გულშემატკივრებისთვის რესპუბლიკის მოედანზე დიდი ეკრანი დამონტაჟდა. საქართველოს ნაკრების ქომაგებს თბილისის ავტობუსების ნაწილი და მეტრო 02:00 საათამდე მოემსახურება.

საქართველომ და უკრაინამ ჯამში ცხრა შეხვედრა ჩაატარეს. უკრაინელებმა ექვსი მატჩი მოიგეს, სამი კი ფრე ანგარიშით დასრულდა. პირველი მატჩი ჯერ კიდევ 1998 წლის აგვისტოში გაიმართა და უკრაინელების სასარგებლოდ, ანგარიშით 4:0 დასრულდა.

საქართველოს ნაკრების მწვრთნელმა ვილი სანიოლმა უეფას ერთა ლიგის მესამე და მეოთხე ტურის მატჩებში უკრაინისა და ალბანეთის ნაკრებების წინააღმდეგ 23 ფეხბურთელი გამოიძახა.

მეკარე: გიორგი მამარდაშვილი („ვალენსია“, ესპანეთი), გიორგი ლორია („ომონია“ არადიპუ, კვიპროსი), ლუკა გუგეშაშვილი („პანსერაიკოსი“, საბერძნეთი)

დაცვა: გურამ კაშია („სლოვანი“, სლოვაკეთი), ოთარ კაკაბაძე („კრაკოვია“, პოლონეთი), გიორგი გველესიანი („პერსეპოლისი“, ირანი), სოლომონ კვერკველია („დინამო თბილისი“), ლაშა დვალი (აპოელ, კვიპროსი), ლუკა ლოჩოშვილი („კრემონეზე“, იტალია), გიორგი გოჩოლეიშვილი („კოპენჰაგენი“, დანია), ლევან შენგელია (ოფი, საბერძნეთი), საბა გოგლიჩიძე („ემპოლი“, იტალია)

ნახევარდაცვა/თავდასხმა: ოთარ კიტეიშვილი („შტურმი“, ავსტრია), გიორგი ქოჩორაშვილი („ლევანტე“, ესპანეთი), სანდრო ალთუნაშვილი („ვოლფსბერგი“, ავსტრია), შოთა ნონიკაშვილი („ჩერკასი“, უკრაინა), გიორგი ჩაკვეტაძე („უოტფორდი“, ინგლისი), გიორგი წიტაიშვილი („გრანადა“, ესპანეთი), ზურიკო დავითაშვილი („სენტ-ეტიენი“, საფრანგეთი), ხვიჩა კვარაცხელია („ნაპოლი“, იტალია), გიორგი გულიაშვილი („სარაევო“, ბოსნია და ჰერცეგოვინა), ბუდუ ზივზივაძე („კარლსრუე“, გერმანია), გიორგი მიქაუტაძე („ლიონი“, საფრანგეთი).

უკრაინის ნაკრები კი საქართველოსთან მატჩს საკადრო დანაკარგებით ჩაატარებს. გუნდს ერთდროულად 9 ფეხბურთელი ვერ დაეხმარება, მათ შორის იარმოლენკო, ციგანკოვი, ლუნინი, ზინჩენკო და მალინოვსკი.

პლეი-ოფის მატჩები 2025 წლის მარტში გაიმართება. ტურნირი დასრულდება ფინალით, რომელიც 2025 წლის 2 ივნისიდან 10 ივნისის ჩათვლით გაიმართება.