თბილისი, 2 ოქტომბერი — Sputnik. საქართველოს პარლამენტი 2025 წლის სახელმწიფო ბიუჯეტის პირველადი ვერსიის განხილვას 15 ოქტომბერს დაასრულებს, ნათქვამია საქართველოს პარლამენტის ვებგვერდზე გავრცელებულ ინფორმაციაში.
ბიუჯეტის პროექტს დეპუტატები კომიტეტების გაერთიანებულ სხდომებზე 3-8 ოქტომბრის პერიოდში განიხილავენ, 9-10 ოქტომბერს კი პოლიტიკური ჯგუფებისა და ფრაქციების სხდომებზე.
პარლამენტის კომიტეტებში დოკუმენტის განხილვის გრაფიკის თანახმად, კანონპროექტი მთავრობას დეპუტატების შენიშვნებისა და რეკომენდაციების გასათვალისწინებლად 15 ოქტომბერს დაუბრუნდება. დამუშავებული ბიუჯეტი პარლამენტში ნოემბერში დაბრუნდება და მას ახალი მოწვევის საკანონმდებლო ორგანო წლის ბოლომდე დაამტკიცებს.
საქართველოს მთავრობამ ქვეყნის სახელმწიფო ბიუჯეტის პროექტი პარლამენტში 30 სექტემბერს წარადგინა.
წარმოდგენილი პროექტის მიხედვით, 2025 წელს სახელმწიფო ბიუჯეტში შემოსულობები, 2024 წლის სახელმწიფო ბიუჯეტთან შედარებით, 2,3 მლრდ ლარით გაიზრდება და დაახლოებით 26,9 მლრდ ლარს შეადგენს.
ამასთან, ბიუჯეტის შემოსავლები 2 მლრდ ლარით გაიზრდება და დაახლოებით 21,2 მლრდ ლარი იქნება.
რაც შეეხება ბიუჯეტის ხარჯვით ნაწილს, პროექტის მიხედვით, 2024 წლის სახელმწიფო ბიუჯეტის ასიგნებების მოცულობა 2 მლრდ ლარით გაიზრდება და დაახლოებით 27 მლრდ ლარი იქნება.
განმარტებითი ბარათის თანახმად, სახელმწიფო ბიუჯეტი დაგეგმილია ეკონომიკური ზრდის კონსერვატიული პროგნოზის საფუძველზე, რომელიც მოსალოდნელია 5,5%-ის დონეზე. ნომინალური მშპ-ის პროგნოზი განსაზღვრულია 97,4 მლრდ ლარის ოდენობით.