თბილისი, 1 ოქტომბერი — Sputnik. საქართველოს პრეზიდენტმა სალომე ზურაბიშვილმა კიდევ ერთხელ გაამხილა ქვეყანაში მოახლოებული საპარლამენტო არჩევნების შემდეგ უცხოური ძალების გეგმები, რამაც მას საშუალება მისცა წინასაარჩევნო კამპანია გერმანიის კანონმდებლობის დარღვევით ეწარმოებინა, განაცხადა დეპუტატმა გურამ მაჭარაშვილმა.
საუბარია 29 სექტემბერს ბერლინის ერთ-ერთ სასტუმროში პრეზიდენტ ზურაბიშვილის დიასპორასთან შეხვედრაზე, სადაც ზურაბიშვილმა საქართველოს მოქალაქეებს პოსტსაარჩევნო პერიოდისა და ოპოზიციური პარტიების თანამშრომლობის შესახებ ინფორმაცია მიაწოდა.
„ის ფაქტი, რომ „ნაციონალური მოძრაობის“ პრეზიდენტი სისტემატურად არღვევს საქართველოს კონსტიტუციას, უკვე ცნობილია. ამავდროულად, უცხოური ძალების და მისი აგენტების არსებობაზე იმითაც შეიძლება ვიმსჯელოთ, რომ კანონმდებლობით აკრძალვის მიუხედავად, მას გერმანიაში საშუალება მისცეს სიტყვით გამოსულიყო", - განაცხადა მაჭავარიანმა.
როგორც დეპუტატმა განმარტა, გერმანიის კანონმდებლობით, უცხო ქვეყნის მოქალაქეებს, თუ მათ ქვეყანაში წინასაარჩევნო კამპანია იმართება, ეკრძალებათ გერმანიაში წინასაარჩევნო კამპანიის წარმოება. ამის მიუხედავად, მაჭარაშვილის თქმით, ზურაბიშვილს გერმანიის კანონმდებლობის დარღვევის შესაძლებლობა მიეცა.
„ზურაბიშვილმა, პრაქტიკულად, კიდევ ერთხელ, მორიგ ჯერზე ფარდა ჩამოხსნა უცხოური ძალების გეგმებს საქართველოში", - განაცხადა მაჭავარიანმა.
მმართველ პარტიაში აცხადებენ, რომ ზურაბიშვილი ახლა „რადიკალურ ოპოზიციას“ შეუერთდა.
მმართველ პარტიაში „რადიკალურ ოპოზიციად" და „კოლექტიურ ნაცმოძრაობად" მოიხსენიებენ „ერთიან ნაციონალურ მოძრაობას“, „სტრატეგია აღმაშენებელს“, „ლელოს საქართველოსთვის“, „გირჩი - მეტი თავისუფლებას“, „ახალს“, „დროას“, ევროპულ საქართველოს“, „ფედერალისტებს“, „ლელოს“, „რესპუბლიკურ პარტიას“ და სხვებს.
საქართველოს პრეზიდენტი და მმართველი პარტია
სალომე ზურაბიშვილსა და მმართველ პარტია „ქართულ ოცნება - დემოკრატიულ საქართველოს“ შორის ურთიერთობა პრეზიდენტობის მესამე წელს გაუარესდა. ყოველ შემთხვევაში, ამის შესახებ ფართო საზოგადოებისთვის მაშინ გახდა ცნობილი.
პრეზიდენტმა მმართველი პარტიის გადაწყვეტილებებით უკმაყოფილების პირველი, თავდაპირველად ფრთხილი მცდელობა 2021 წელს გამოხატა. დროთა განმავლობაში ზურაბიშვილის რიტორიკა სულ უფრო ხისტი ხდებოდა და ახლა არაფრით განსხვავდება ხელისუფლების მთავარი ოპონენტების განცხადებებისგან.
მას შემდეგ, რაც ზურაბიშვილმა 2023 წლის 31 მარტს პარლამენტს წარუდგინა თავისი წლიური ანგარიში, რომელშიც მან, სხვა საკითხებთან ერთად, „ქართული ოცნება“ პროდასავლური გზიდან გადახვევაში დაადანაშაულა, მთავრობამ შეწყვიტა მისი უცხოური ვიზიტების დამტკიცება. ამის მიუხედავად, პრეზიდენტმა უცხოური ვიზიტები გააგრძელა, „ქართულმა ოცნებამ“ კი იმპიჩმენტის პროცესი დაიწყო.
იმპიჩმენტის პროცედურა მას შემდეგ დაიწყო, რაც ზურაბიშვილი 31 აგვისტოს უცხოეთის ტურნეში გაემგზავრა და მთავრობის თანხმობის გარეშე დაიწყო შეხვედრები ევროკავშირის ქვეყნების ლიდერებთან. მინისტრთა კაბინეტმა მოგზაურობის ნებართვის მიცემაზე უარი ახსნა იმით, რომ ხელისუფლებამ დაკარგა ნდობა მის მიმართ. ზურაბიშვილმა განაცხადა, რომ მისი ევროპაში მოგზაურობის მიზანია დაეხმაროს საქართველოს ევროკავშირის წევრობის კანდიდატი ქვეყნის სტატუსის მოპოვებაში.
საქართველოს საკონსტიტუციო სასამართლომ 16 ოქტომბერს დაადასტურა ქვეყნის პრეზიდენტ სალომე ზურაბიშვილის მიერ ქვეყნის მთავარი კანონის – კონსტიტუციის 52-ე მუხლის დარღვევა, რომლის თანახმად პრეზიდენტს საგარეო ურთიერთობებში წარმომადგენლობითი ფუნქციების განხორციელება მხოლოდ მთავრობის ნებართვით შეუძლია. მაგრამ „ქართული ოცნების“ წარმატებები ამით დასრულდა, თუმცა, როგორც თავდაპირველად მმართველი პარტიის წარმომადგენლებმა განაცხადეს, მეტის იმედი არც ჰქონდათ, რადგან საქმის ბოლომდე მისაყვანად პარლამენტში საკმარისი ხმები არ აქვთ.
ზურაბიშვილის იმპიჩმენტს ხმა მხოლოდ 86-მა დეპუტატმა დაუჭირა მინიმალური 100-ის ნაცვლად. შესაბამისად, პრეზიდენტმა თანამდებობა შეინარჩუნა. იმავე დღეს კობახიძემ განაცხადა, რომ ზურაბიშვილი არის არა ქვეყნის, არამედ „ნაცმოძრაობის“ პრეზიდენტი.