თბილისი, 12 სექტემბერი – Sputnik. ლატვიის დედაქალაქ რიგაში საერთაშორისო გამოფენაზე RIGA FOOD 2024 შვიდი ქართული კომპანია მონაწილეობდა, იუწყება გარემოს დაცვისა და სოფლის მეურნეობის სამინისტრო.
საკუთარი პროდუქცია წარმოდგენილი ჰქონდა სასოფლო-სამეურნეო პროდუქციის მწარმოებელ კომპანიებს შპს „აჩინებულს“, შპს „ჯეონატურალსს“, შპს „აქვაგეოს“, შპს „ძმებ ხუციშვილებს“, კოოპერატივ „რუისპირი-იყალთოს“, შპს „ვინაგორას“, შპს „კულას“. წარმოდგენილი იყო ღვინო, ნატურალური წვენები, სხვადასხვა სახის კონსერვები.
ქართველი მწარმოებლები კომპანიები გამოფენაზე გარემოს დაცვისა და სოფლის მეურნეობის სამინისტროს მხარდაჭერით და სოფლის განვითარების სააგენტოს ორგანიზებით წარსდგნენ.
„ვაგრძელებთ ქართული პროდუქციის მხარდაჭერას სტრატეგიულ ბაზრებზე; განსაკუთრებით მნიშვნელოვანი, რა თქმა უნდა, ევროკავშირის ბაზარია“, - აღნიშნა სოფლის განვითარების სააგენტოს დირექტორმა დავით წითლიძემ.
მისი თქმით, საერთაშორისო გამოფენებში მონაწილეობა ქართული კომპანიებს მნიშვნელოვანად უწყობს ხელს გაზარდონ საკუთარი საექსპორტო შესაძლებლობები.
სოფლის განვითარების სააგენტოს დირექტორმა დავით წითლიძემ და ლატვიის რესპუბლიკაში საქართველოს საგანგებო და სრულუფლებიანმა ელჩმა ირაკლი ყურაშვილმა ქართულ სტენდზე ლატვიის რესპუბლიკის სოფლის მეურნეობის მინისტრ არმანდს კრაუზესაც უმასპინძლეს.
ლატვიის რესპუბლიკაში საქართველოს საგანგებო და სრულუფლებიანი ელჩის, ირაკლი ყურაშვილის განცხადებით, საქართველოს მონაწილეობა საერთაშორისო გამოფენაზე „RIGA FOOD 2024” განსაკუთრებით მნიშვნელოვანია, რადგან ლატვიაში ქართული პროდუქციის მიმართ ინტერესი გაზრდილია, განსაკუთრებით მას შემდეგ, რაც საქართველო ევროკავშირის წევრობის კანდიდატი ქვეყანა გახდა.
„ლატვიის ხელისუფლების წარმომადგენლების მიერ ქართული სტენდის მონახულება კიდევ ერთხელ ადასტურებს საქართველოს მიმართ ლატვიის ინტერესს“, - განაცხადა ირაკლი ყურაშვილმა
მიმდინარე წელს, RIGA FOOD 2024 გამოფენაში მონაწილეობას 30 ქვეყანა და სასოფლო-სამეურნეო სექტორში მოქმედი 400-ზე მეტი ადგილობრივი და საერთაშორისო კომპანია იღებდა.