თბილისი, 10 სექტემბერი — Sputnik. ჩინურმა ავიაკომპანია SF Airlines-მა 2024 წლის სექტემბრიდან თბილისი-ურუმჩი-თბილისის მარშრუტზე ჩარტერული სატვირთო ფრენების სიხშირე ორამდე გაზარდა, ნათქვამია სამოქალაქო ავიაციის სააგენტოს მიერ გავრცელებულ განცხადებაში.
SF Airlines-მა ახალი საერთაშორისო სატვირთო მარშრუტის შესრულება 2024 წლის ივლისიდან დაიწყო. ფრენები Boeing B757-ით სრულდება.
ავიაგადამზიდმა გაზრდილი სიხშირით ფრენების განხორციელების ნებართვა სამოქალაქო ავიაციის სააგენტოსგან უკვე მიიღო.
ურუმჩიდან თბილისის მიმართულებით მგზავრთა ავიაგადაზიდვები 2023 წლიდან დაიწყო. ჩინეთის ერთ-ერთმა წამყვანმა ავიაკომპანია China Southern Airlines-მა რეისი ურუმჩი–თბილისი–ურუმჩი, 27 იანვარს, სამი წლის მანძილზე პირველად შეასრულა.
China Southern Airlines-მა საქართველოს მიმართულებით ფრენები COVID-19 ინფექციასთან დაკავშირებული პანდემიის გამო 2020 წლის იანვარში შეაჩერა. ბოლო რეგულარული რეისი საქართველოს მიმართულებით 2020 წლის 23 იანვარს განხორციელდა.
გარდა ამისა, 2024 წლის 15 სექტემბრიდან თბილისის საერთაშორისო აეროპორტში ჩინეთის უმსხვილესი სახელმწიფო ავიაკომპანია AIR CHINA დაიწყებს ოპერირებას.