თბილისი, 10 სექტემბერი — Sputnik. ნებისმიერ კომპანიას, მათ შორის, რუსულს, რომელიც არ არის სანქცირებული, შეუძლია შემოვიდეს ქვეყანაში და აწარმოოს ბიზნესი, განაცხადა მმართველი პარტია „ქართული ოცნება-დემოკრატიული საქართველოს" გენმდივანმა კახა კალაძემ ჟურნალისტებთან.
რუსულმა ონლაინ-გაყიდვების კომპანია OZON-მა საქართველოში მიტანის სერვისი აამოქმედა. მოქალაქეები შეკვეთის მიღებას სახლთან ახლოს, პარტნიორი კომპანიების გაცემის პუნქტებში ან საკურიერო მომსახურების მეშვეობით შეეძლებათ. პირველ ეტაპზე პროდუქციის მიწოდებას 14 დღე დასჭირდება.
კალაძის თქმით, წლების წინ ქვეყანაში სტრატეგიული ობიექტები რუსულ კომპანიებზე იქნა გასხვისებული.
„ნებისმიერ ადამიანს, კომპანიას, მათ შორის, რუსულ კომპანიას, რომელიც არ არის სანქცირებული, შეუძლია შემოვიდეს ქვეყანაში, აწარმოოს ბიზნესი, დაასაქმოს ადამიანები. ვერანაირ პრობლემას ვერ ვხედავ ამასთან დაკავშირებით. აქვე, თქვენ რომ სამართლიანი იყოთ, მე გაგახსენებთ, რომ წლების წინ ქვეყანაში სტრატეგიული ობიექტები გასხვისებული იქნა რუსულ კომპანიებზე, არა მხოლოდ ჩვეულებრივ კომპანიებზე, არამედ რუსულ სახელმწიფო კომპანიებზე“, – განაცხადა კალაძემ.
როგორც მან აღნიშნა, საქართველო არ შეუერთდა რუსეთის წინააღმდეგ სანქციებს და ღიაა ბიზნესისთვის.
„ჩვენ, რა თქმა უნდა, არ ვუერთდებით სანქციებს და ამასთან დაკავშირებით აბსოლუტურად ღიად განვაცხადეთ. საქართველოს კარი ღიაა ტურისტებისთვის, ასევე ბიზნესისთვის", - განაცხადა კალაძემ.
უკრაინაში კონფლიქტის დაწყებისთანავე საქართველოს ხელისუფლებამ განაცხადა, რომ რუსეთის ფედერაციის წინააღმდეგ სანქციებს არ დააწესებდა, რადგან ამით მხოლოდ საქართველო დაზარალდებოდა.
საქართველოს ხელისუფლება სისტემატურად აცხადებს, რომ ქვეყანა იცავს საერთაშორისო ანტირუსულ სანქციებს, რომლებიც დაკავშირებულია ფინანსებთან და საზღვარზე საქონლის გადაადგილებასთან. დღემდე არცერთი გამოთქმული ბრალდება არ დადასტურებულა.