თბილისი, 10 სექტემბერი — Sputnik. საქართველოს თავდაცვის მინისტრმა ირაკლი ჩიქოვანმა ბათუმში მიმდინარე აზერბაიჯანი-საქართველო-თურქეთის მინისტერიალის ფარგლებში აზერბაიჯანის თავდაცვის მინისტრ ზაქირ ჰასანოვთან შეხვედრა გამართა, ნათქვამია თავდაცვის სამინისტროს მიერ გავრცელებულ განცხადებაში.
ბათუმში აზერბაიჯანის, საქართველოსა და თურქეთის თავდაცვის მინისტრების რიგით მე-11 სამმხრივი შეხვედრა მიმდინარეობს.
საქართველოს და აზერბაიჯანის თავდაცვის მინისტრებმა ორმხრივ შეხვედრაზე მეზობელ ქვეყნებს შორის არსებული მეგობრული ურთიერთობის, რეგიონში მშვიდობისა და სტაბილურობის ხელშეწყობის მნიშვნელობაზე ისაუბრეს.
ირაკლი ჩიქოვანმა აზერბაიჯანელ კოლეგასთან შეხვედრა გამართა
© Ministry of Defence of Georgia
მხარეებმა თავდაცვის სფეროში თანამშრომლობის მიმართულებები, მათ შორის, სამხედრო განათლების საკითხებიც განიხილეს.
შეხვედრას საქართველოს თავდაცვის ძალების მეთაური, გენერალ-მაიორი გიორგი მათიაშვილი, თავდაცვის უწყების ოფიციალური პირები, ასევე აზერბაიჯანის დელეგაციის წარმომადგენლები ესწრებოდნენ.
საქართველო, თურქეთი და აზერბაიჯანი სტრატეგიული მოკავშირეები არიან. ქვეყნებს შორის თავდაცვის სფეროში თანამშრომლობა 2012 წელს დაიწყო.