თბილისი, 7 სექტემბერი — Sputnik. საქართველოში მშენებლობის ღირებულების ინდექსი 2024 წლის ივლისში, მიმდინარე წლის ივნისთან შედარებით, 0,9%-ით გაიზარდა, იუწყება საქართველოს სტატისტიკის ეროვნული სამსახური „საქსტატი".
უწყებამ მშენებლობის ღირებულების ყოველთვიური ინდექსის (CCI) გაანგარიშება დაიწყო, რომელიც წარმოადგენს ფასების საშუალო დონეს იმ სამშენებლო მასალებსა და მომსახურებაზე, რაც აუცილებელია სხვადასხვა ტიპის ნაგებობების მშენებლობისთვის საანგარიშო პერიოდში საბაზო პერიოდთან შედარებით.
უწყების ცნობით, თვიური ინდექსის გაზრდა ძირითადად მოხდა მშენებლობაზე დასაქმებულთა ხელფასის 5,4%-ით გაზრდის ხარჯზე.
2024 წლის ივლისში, 2023 წლის ივლისთან შედარებით, მშენებლობის ღირებულების ინდექსი გაიზარდა7,8%-ით, რაც გამოწვეული იყო ხელფასების 24,5%-ით გაზრდით.
მშენებლობის ღირებულების ინდექსი მნიშვნელოვანი მაკროეკონომიკური მაჩვენებელია, რომელიც აუცილებელია როგორც ქვეყნის საინვესტიციო გარემოს შესაფასებლად, ასევე სამშენებლო ინდუსტრიაში დაგეგმარებისა და გადაწყვეტილების მიღებისთვის.