თბილისი, 3 სექტემბერი - Sputnik. საქართველოს პარლამენტის თავმჯდომარე შალვა პაპუაშვილმა აზერბაიჯანს საპარლამენტო არჩევნების წარმატებით ჩატარება მიულოცა.
აზერბაიჯანში რიგგარეშე საპარლამენტო არჩევნები კვირას, 1-ელ სექტემბერს ჩატარდა - ქვეყნის პრეზიდენტმა ილჰამ ალიევმა მეექვსე მოწვევის მილი მეჯლისის (პარლამენტის) დაშლისა და ვადამდელი არჩევნების დანიშვნის შესახებ განკარგულებას ხელი 28 ივნისს მოაწერა.
აზერბაიჯანის ცესკოს მონაცემებით, ვადამდელი საპარლამენტო არჩევნების შედეგად, ილჰამ ალიევის პარტია „ახალი აზერბაიჯანი“ 125-ადგილიან მილი მეჯლისში 68 ადგილს მოიპოვებს.
„გულითადად ვულოცავ აზერბაიჯანს საპარლამენტო არჩევნების წარმატებით ჩატარებას. მილი მეჯლისმა მოიპოვა აზერბაიჯანელი ხალხის დემოკრატიული მანდატი, რათა განაგრძოს ძლიერი და ერთიანი აზერბაიჯანის მშენებლობა. მოუთმენლად ველი ჩემს აზერბაიჯანელ კოლეგებთან მჭიდრო თანამშრომლობას ჩვენი ხალხებისთვის მშვიდობის, უსაფრთხოებისა და კეთილდღეობის უზრუნველყოფის საქმეში“, – დაწერა შალვა პაპუაშვილმა სოციალურ ქსელში.
გავრცელებული ინფორმაციით, მთელი ქვეყნის მასშტაბით 6,343 საარჩევნო უბანი იყო გახსნილი, მათგან 54 - ყარაბაღის ტერიტორიაზე. სულ ქვეყანაში 6 მლნ 421 ათას 960 ამომრჩეველი იყო რეგისტრირებული, ამომრჩეველთა აქტივობამ 37,27% შეადგინა.
კანონის თანახმად, აზერბაიჯანის მილი მეჯლისის არჩევნები ნოემბერში უნდა ჩატარებულიყო, თუმცა კენჭისყრა გადაიდო, რადგან სწორედ ამ დროს აზერბაიჯანი გაეროს კლიმატურ კონფერენციას, COP29-ს უმასპინძლებს, რომელზეც 80 ათასზე მეტ სტუმარს ელოდებიან, მათ შორის 50-ზე მეტი ქვეყნის სახელმწიფოსა და მთავრობის მეთაურებს.