თბილისი, 1 სექტემბერი - Sputnik. აზერბაიჯანში რიგგარეშე საპარლამენტო არჩევნები კვირას, 1-ელ სექტემბერს ტარდება.
საარჩევნო უბნებზე ხმის მიცემა ადგილობრივი დროით 08:00 საათზე დაიწყო და 19:00 საათამდე გაგრძელდება.
არჩევნები მაჟორიტარული სისტემით ტარდება. გამარჯვებული თავის ოლქში გახდება ის კანდიდატი, რომელიც ხმათა უბრალო უმრავლესობას მიიღებს. აზერბაიჯანის 125-კაციან პარლამენტს 5 წლის ვადით ირჩევენ.
ცესკოს მონაცემებით, მთელი ქვეყნის მასშტაბით 6,343 საარჩევნო უბანია გახსნილი, მათგან 54 - ყარაბაღის ტერიტორიაზე. სულ ქვეყანაში 6 მლნ 421 ათას 960 ამომრჩეველია რეგისტრირებული, მათგან 51 ათასზე მეტი პირველად იღებს მონაწილეობას არჩევნებში.
ცესკო პირველადი შედეგების გამოცხადებას 2 სექტემბრის ღამეს გეგმავს, საბოლოო შედეგებს კი 20 დღის განმავლობაში გამოაცხადებს.
კანონის თანახმად, აზერბაიჯანის მილი მეჯლისის არჩევნები ნოემბერში უნდა ჩატარებულიყო, თუმცა კენჭისყრა გადაიდო, რადგან სწორედ ამ დროს აზერბაიჯანი გაეროს კლიმატურ კონფერენციას, COP29-ს უმასპინძლებს, რომელზეც 80 ათასზე მეტ სტუმარს ელოდებიან, მათ შორის 50-ზე მეტი ქვეყნის სახელმწიფოსა და მთავრობის მეთაურებს.