თბილისი, 19 ივნისი — Sputnik. საქართველოს ნაკრები ევროპის ჩემპიონატზე შემთხვევით არ მოხვედრილა, განაცხადა თურქეთის ნაკრების მთავარმა მწვრთნელმა ვინჩენცო მონტელამ პრესკონფერენციაზე.
18 ივნისს, გერმანიაში ევროპის ჩემპიონატზე საქართველოს ნაკრები სადებიუტო მატჩში თურქეთთან ანგარიშით 3:1 დამარცხდა - მოწინააღმდეგის კარში ერთადერთი გოლი გიორგი მიქაუტაძემ გაიტანა.
„საქართველოს ნაკრები ფიზიკურად ძლიერი და კარგად ორგანიზებული გუნდია, იციან თავიანთი ძლიერი და სუსტი მხარეები და შესაბამისად თამაშობენ. ამ გუნდმა დაამტკიცა, რომ ევროპის ჩემპიონატზე შემთხვევით არ მოხვედრილა", - განაცხადა მონტელამ.
მისი თქმით, ნაკრების გამარჯვებაში თურქმა გულშემატკივარმა დიდი როლი შეასრულა.
„ეს გამარჯვება მათ ეკუთვნით. 18 ივნისს 50 წლის გავხდი, ასე რომ, დაბადების დღეზე უკეთეს საჩუქარს ვერც ვინატრებდი", - განაცხადა თურქეთის ნაკრების მწვრთნელმა.
როგორც მონტელამ აღნიშნა, გუნდი ბოლო სამ ევროპის ჩემპიონატზე ჯგუფური ეტაპიდან ვერ გავიდა და პირველი შემთხვევაა, როცა თურქეთის ნაკრებმა სასტარტო მატჩი მოიგო.
„წინა ევროზე ქულაც კი ვერ მოვიპოვეთ. ახლა კი მიზნად პლეი ოფში გასვლას ვისახავთ“, - განაცხადა მან.
საქართველოს ნაკრები მომდევნო მატჩს 22 ივნისს, ჰამბურგში, ჩეხეთთან გამართავს, 26 ივნისს კი პორტუგალიასთან. თუ საქართველოს ნაკრები F ჯგუფში მესამე ადგილს დაიკავებს, გუნდს ევრო 2024-ის პლეი-ოფში გასვლის შანსი ექნება.
ჩეხეთთან მატჩი თბილისის დროით 17:00 საათზე დაიწყება.