თბილისი, 11 ივნისი — Sputnik. ევროპარლამენში ძალების გადანაწილების კუთხით შეიძლება გარკვეული ცვლილებები მოხდეს არჩევნებში მემარჯვენე ძალების მნიშვნელოვანი წარმატების გათვალისწინებით, განაცხადა საპარლამენტო უმრავლესობის წევრმა მაკა ბოწორიშვილმა.
ევროპარლამენტის არჩევნები 6-9 ივნისის პერიოდში ევროკავშირის 27 ქვეყანაში ჩატარდა. გაიმარჯვა იგივე „ევროპის სახალხო პარტიამ", თუმცა, მემარჯვენე და ულტრამემარჯვენე პარტიებმა გააუმჯობესეს თავიანთი შედეგები ევროკავშირის ძირითად ქვეყნებში, მათ შორის იტალიაში, გერმანიასა და საფრანგეთში. უფრო მეტიც, ბოლო ორ ქვეყანაში მმართველი პარტიები მემარჯვენეებთან დამარცხდნენ.
„საყურადღებოა, რომ მემარჯვენე ძალებმა საკმაოდ დიდ წარმატებას მიაღწიეს, თუნდაც, ლიბერალურ ძალებთან მიმართებაში და, შესაძლოა, გარკვეული ცვლილებები იყოს ძალთა გადანაწილებაში ევროპარლამენტში", - განაცხადა ბოჭორიშვილმა.
ამასთან, როგორც დეპუტატმა აღნიშნა, საყურადღებო მოვლენები ვითარდება თავად ევროკავშირის წევრ ქვეყნებში.
„შეიძლება ითქვას, რომ ამ არჩევნებმა უკვე გარკვეულწილად სათქმელი თქვა და გამოიწვია მთელი რიგი მოვლენები ევროკავშირის წევრ სახელმწიფოებში”, - განაცხადა ბოჭორიშვილმა.
„ევროპის სახალხო პარტიამ", რომელსაც ევროკომისიის პრეზიდენტი ურსულა ფონ დერ ლაიენი წარმოადგენს, ევროპარლამენტში 720 ადგილიდან 185 მოიპოვა, ცხრა მანდატით მეტი, ვიდრე 2019 წელს.
მეორე ადგილი „სოციალისტებისა და დემოკრატების პროგრესულ ალიანსს“ ერგო. მან მიიღო 137 საპარლამენტო მანდატი, ანუ ორით ნაკლები 2019 წელთან შედარებით.
მესამე ადგილზე გავიდა „ პარტია „განაახლე ევროპა“, რომელშიც მაკრონის პარტია „რენესანსი" შედის, მხოლოდ 79 ადგილი მოიპოვა.
ევროპარლამენტის არჩევნებში საპრეზიდენტო პარტიის გამანადგურებელი დამარცხების შემდეგ, რომელიც უკან ჩამოიტოვა ულტრამემარჯვენე პარტია „ეროვნულმა გაერთიანებამ" ემანუელ მაკრონმა დაითხოვა პარლამენტი და დანიშნა ახალი არჩევნები.
როგორც ევროკომისიის მოქმედმა პრეზიდენტმა ურსულა ფონ დერ ლაიენმა უკვე განაცხადა, იგი დარწმუნებულია რომ აღნიშნულ თანამდებობას ახალი ვადით კვლავ დაიკავებს.