თბილისი, 3 ივნისი, − Sputnik. რუსეთის გენერალურმა პროკურატურამ აშშ-ის, გერმანიის, საფრანგეთისა და კვიპროსის კომპეტენტურ ორგანოებს დამატებითი მოთხოვნები გაუგზავნა რუსეთის წინააღმდეგ ტერქატებთან, მათ შორის, „ჩრდილოეთის ნაკადებზე“ მომხდარ აფეთქებებთან დაკავშირებით, განუცხადა ჟურნალისტებს სამეთვალყურეო უწყების ოფიციალურმა წარმომადგენელმა ანდრეი ივანოვმა.
„რუსეთის ფედერაციის გენერალურმა პროკურატურამ დამატებითი მოთხოვნები გაუგზავნა შეერთებული შტატების, გერმანიის, საფრანგეთისა და კვიპროსის კომპეტენტურ ორგანოებს ტერორისტულ აქტებთან და მათთან დაკავშირებულ დანაშაულებრივ ქმედებებთან დაკავშირებით, რომლებიც რუსეთის ტერიტორიაზე იყო ჩადენილ რუსეთისა და მისი მოქალაქეების ინტერესების საწინააღმდეგოდ − მათ შორის, საერთაშორისო ტერორიზმის აქტთან − „ჩრდილოეთის ნაკადი 1-სა“ და „ჩრდილოეთის ნაკადი 2-ზე“ აფეთქებებთან დაკავშირებით“, − განაცხადა ივანოვმა.
მისი თქმით, მიუხედავად არსებული ფაქტებისა, „აშშ-ის, კვიპროსისა და საფრანგეთის კომპეტენტურმა ორგანოებმა არ გამოიკვლიეს დაფინანსებისა და სხვა სახის ხელშეწყობის გარემოებები“ ამ ტერაქტების ჩადენაში, ხოლო გერმანიის კომპეტენტური ორგანოები „თავს არიდებენ რუსეთთან თანამშრომლობის შესახებ საერთაშორისო ვალდებულებების შესრულებას“.
ამასთან ყველა ეს ქვეყანა საერთაშორისო ანტიტერორისტული კონვენციის მონაწილეა.
„ამ კუთხით, ისინი ვალდებულნი არიან, მიიღონ ზომები ტერორიზმისა და მისი დაფინანსების გამოსაძიებლად, აგრეთვე მაქსიმალური დახმარება გაუწიონ მსგავსი უკანონო ქმედებების გამოძიებას, მათ შორის, ხელი შეუწყონ პროცესისთვის საჭირო მტკიცებულებების მოპოვებას“, - დასძინა ივანოვმა