თბილისი, 31 მაისი – Sputnik. საგამოძიებო სამსახურის თანამშრომლებმა დიდი ოდენობით სხვისი ქონების თაღლითურად დაუფლებისთვის ერთი ადამიანი დააკავეს, ხოლო კიდევ ორ პირს ბრალი დაუსწრებლად წარედგინა, ნათქვამია უწყების გვერდზე გავრცელებულ ინფორმაციაში.
გამოძიებით დადგინდა, რომ ბრალდებულები ყალბი უცხოენოვანი მინდობილობებისა და ყალბი ნასყიდობის ხელშეკრულებების გამოყენებით, უკანონოდ დაეუფლნენ უცხო ქვეყნის მოქალაქეების კუთვნილ თბილისში მდებარე დაახლოებით 1.480.000 ლარის ღირებულების ორ კომერციულ ფართსა და სამ საცხოვრებელ ბინას. ასევე, შეეცადნენ ამავე გზით დაუფლებოდნენ თბილისში მდებარე ორ კომერციულ ფართს, რომლის ღირებულებაც დაახლოებით 245.000 ლარია.
გამოძიების პროცესში თაღლითური გზით ნაშოვნი უძრავი ქონება დაყადაღდა.
გამოძიება ყალბი ოფიციალური და ქონებრივი უფლებამოსილების დამადასტურებელი დოკუმენტების დამზადება-გამოყენების გზით, ორგანიზებული ჯგუფის მიერ, დიდი ოდენობით სხვისი ქონების თაღლითურად დაუფლების მუხლებით მიმდინარეობს.
დანაშაული 7-დან 10 წლამდე ვადით თავისუფლების აღკვეთას ითვალისწინებს.
უწყების ცნობით, ტარდება შესაბამისი ღონისძიებები აღნიშნულ დანაშაულში მონაწილე სხვა პირების დადგენა-მხილების მიზნით.