როგორ შეიცვალა ფასები სამრეწველო პროდუქციაზე – ახალი სტატისტიკა

თბილისი, 29 მაისი — Sputnik. სამრეწველო პროდუქციის მწარმოებელთა ფასების ინდექსი 2024 წლის აპრილში, 2023 წლის ანალოგიურ პერიოდთან შედარებით, 5,9%-ით გაიზარდა, ნათქვამია საქართველოს სტატისტიკის ეროვნული სამსახურის „საქსტატის" მასალებში.

ინდექსის ფორმირებაზე ძირითადად გავლენა იქონია ფასების შემცირებამ გადამამუშავებელ მრეწველობაში – 0,9%-ით, მათ შორის ფასები სურსათზე შემცირდა – 0,3%–ით, ხოლო სამთო-მომპოვებელ მრეწველობაში ფასები გაიზარდა 9,%-ით.

2024 წლის აპრილში 2024 წლის მარტთან შედარებით, ფასები სამრეწველო პროდუქციაზე 0,8%-ით გაიზარდა, იუწყება „საქსტატი".

ფასები შიდა ბაზრისთვის გათვლილ საქართველოში წარმოებულ პროდუქციაზე აპრილში, 2023 წლის ანალოგიურ პერიოდთან შედარებით, 4,8%-ით გაიზარდა.

ყველაზე მეტად ფასები გაიზარდა სამთო-მომპოვებელ მრეწველობაში – 12,5%-ით, გადამამუშავებელ მრეწველობაში 2,6%-ით.

ექსპორტზე გატანილი სამრეწველო პროდუქციის ფასების ინდექსი აპრილში, 2023 წლის ანალოგიურ პერიოდთან შედარებით, 6,7%-ით გაიზარდა.

სამთო-მომპოვებელი მრეწველობის პროდუქციაზე ფასები 21,8%-ით გაიზარდა. გადამამუშავებელი მრეწველობის ექსპორტირებულ პროდუქციაზე ფასები გაიზარდა 5,5%-ით, მათ შორის სასურსათო პროდუქციაზე - 30,3%-ით.

საქართველოში იმპორტირებულ სამრეწველო პროდუქციაზე ფასები საანგარიშო პერიოდში 0,6%-ით გაიზარდა. ამასთან გადამამუშავებელი მრეწველობის იმპორტირებული პროდუქცია 4,4%-ით გაძვირდა.

წლიური ინფლაციის დონემ 2024 წლის აპრილში 1,5% შეადგინა (მიზნობრივი მაჩვენებელია 3%). ამასთან, წლის მანძილზე სურსათზე ფასები 1,4%-ით შემცირდა. 2024 წლის აპრილში 2024 წლის მარტთან შედარებით ინფლაციის დონემ 0,3% შეადგინა.