„ეს სპეკულაციაა" - პაპუაშვილი რეფერენდუმის ჩატარების შესახებ პრეზიდენტის ინიციატივაზე

თბილისი, 29 მაისი – Sputnik. სპეკულაცია, რომელიც არ ემთხვევა ქართველი ხალხის ნებას, ასე უწოდა პარლამენტის თავმჯდომარე შალვა პაპუაშვილმა საქართველოს საგარეო კურსთან დაკავშირებით რეფერენდუმის ჩატარების შესახებპრეზიდენტ სალომე ზურაბიშვილის ინიციატივას.

მას შემდეგ, რაც დეპუტატებმა „უცხოური გავლენების გამჭვირვალობის შესახებ“ კანონზე ვეტო დაძლიეს, პრეზიდენტმა სალომე ზურაბიშვილმა პარლამენტის შენობის წინ „უცხოური გავლენის გამჭვირვალობის შესახებ“ კანონპროექტის წინააღმდეგ გამართული აქციის მონაწილეებისადმი ვიდეომიმართვაში მათ მხარდაჭერა გამოუცხადა და მოუწოდა ქვეყნის საგარეო კურსთან დაკავშირებით რეფერენდუმის ჩასატარებლად შეაგროვონ ხელმოწერები და მას მიუტანონ, რათა ხელი მოაწეროს შესაბამის დოკუმენტს.

მისი თქმით, ასეთი გეგმები თავისთავად არ ჩნდება, არამედ „ნაჩურჩულებია უცხოელი მფარველების მიერ".

„გამოდის, რომ ის ხელოვნური გეგმები, რომლებსაც ისინი ხანდახან საკუთარი თავის წინაშე აყენებენ, არის მათი უცხოელი მფარველების მიერ ნაჩურჩულები და ეს საერთოდ არ ემთხვევა ქართველი ხალხის ნებას და სინამდვილეს“, - აღნიშნა პაპუაშვილმა.

სპიკერის თქმით, ხელისუფლების ოპონენტებს ურთიერთობა არ აქვთ ხალხთან, არ ესაუბრებიან უბრალო ადამიანებს, არ აინტერესებთ მათი სიხარული და მწუხარება. „ისინი რთავენ ტელევიზორს, უსმენენ სხვა ქვეყნების განცხადებებს და ამის საფუძველზე ქმნიან თავიანთ დღის წესრიგს“, დასძინა პაპუაშვილმა.

საარჩევნო კოდექსის თანახმად, საქართველოს პრეზიდენტი უფლებამოსილია პარლამენტის, მთავრობის ან არანაკლებ 200 ათასი ამომრჩევლის მოთხოვნით დანიშნოს რეფერენდუმი მისი დანიშვნის მოთხოვნის მიღებიდან 30 დღის განმავლობაში.

28 მაისს, სამშაბათს, საქართველოს პარლამენტმა „უცხოური გავლენის გამჭვირვალობის შესახებ" კანონპროექტზე პრეზიდენტ სალომე ზურაბიშვილის ვეტო დაძლია და რეზონანსული კანონი საბოლოოდ მიიღო - ვეტოს დაძლევას მხარი დაუჭირა 84 დეპუტატმა, წინააღმდეგ ხმა მისცა 4-მა დეპუტატმა.

წამყვანი ოპოზიციური პარტიები და ცნობილი არასამთავრობო ორგანიზაციები ამტკიცებენ, რომ ინიცირებული კანონპროექტი „უცხოური გავლენის გამჭვირვალობის შესახებ“ ერთ სიბრტყეზე აყენებს საქართველოს მეგობრებსა და მტრებს, „ენჯეოებს“ იარლიყებს აწებებს და აფერხებს ქვეყნის ევროინტეგრაციას. თბილისში 15 აპრილიდან საპროტესტო აქციები იმართება.

კანონის მიღებაზე უარისკენ ხელისუფლებას მოუწოდა ევროკავშირმა, ევროპულმა საბჭომ, გაერომ, აშშ-ის სახელმწიფო დეპარტამენტმა და საქართველოს ზოგიერთი პარტნიორის, დასავლური ქვეყნის ლიდერებმა.

საქართველოს ხელისუფლებაში აღნიშნავენ, რომ დასავლეთის კრიტიკა გაუგებარია, რადგან უცხოური დაფინანსების გამჭვირვალობის შესახებ კანონები აქვთ აშშ-ს, ისრაელსა და ავსტრალიას და ასეთი კანონპროექტები განხილვის სტადიაშია ევროკავშირსა და საფრანგეთში.