პრემიერი: საქართველოსა და აზერბაიჯანის თანამშრომლობა რეგიონში სტაბილურობის გარანტია

თბილისი, 28 მაისი — Sputnik. საქართველოსა და აზერბაიჯანს შორის თანამშრომლობის გაღრმავება ხელს შეუწყობს რეგიონში კეთილდღეობისა და სტაბილურობის უზრუნველყოფას, ნათქვამია აზერბაიჯანის დამოუკიდებლობის დღესთან დაკავშირებით საქართველოს პრემიერ-მინისტრ ირაკლი კობახიძის მიერ აზერბაიჯანის პრეზიდენტ ილჰამ ალიევისადმი მისალოც წერილში.

აზერბაიჯანმა დამოუკიდებლობა პირველად 1918 წლის 28 მაისს მოიპოვა, გამოაცხადა აზერბაიჯანის დემოკრატიული რესპუბლიკა, რომელმაც მხოლოდ 23 თვე იარსება. დამოუკიდებლობა აღდგა 71 წლის შემდეგ, 1991 წლის 18 ოქტომბერს, აზერბაიჯანის დამოუკიდებლობის აქტის მიღებით. აღსანიშნავია, რომ აზერბაიჯანის დამოუკიდებლობის შესახებ დეკლარაციას თბილისში მოეწერა ხელი.

საქართველოს პრემიერ-მინისტრმა იმედი გამოთქვა, რომ საქართველოსა და აზერბაიჯანს შორის თანამშრომლობა „კიდევ უფრო განმტკიცდება, რაც ხელს შეუწყობს რეგიონში კეთილდღეობისა და სტაბილურობის უზრუნველყოფას“.

როგორც კობახიძემ აღნიშნა, საქართველოსა და აზერბაიჯანს შორის სტრატეგიული პარტნიორობა ეფუძნება მეგობრობის ღრმა, მრავალსაუკუნოვან ტრადიციას, რაც მნიშვნელოვანი ფაქტორია ქვეყნებს შორის ეფექტური თანამშრომლობის განვითარებისთვის.

„განსაკუთრებით მინდა აღვნიშნო, რომ აზერბაიჯანთან ორმხრივი და კეთილმეზობლური ურთიერთობა ჩვენი ხელისუფლების უმთავრესი პრიორიტეტია", აღნიშნა კობახიძემ.

საქართველოს პრემიერ-მინისტრმა აზერბაიჯანს აყვავება, მშვიდობა და მიღწევები უსურვა.

საქართველომ და აზერბაიჯანმა დიპლომატიური ურთიერთობა 1992 წლის 18 ნოემბერს დაამყარეს. ქვეყნები აქტიურად თანამშრომლობენ ვაჭრობის, ტრანსპორტის, ენერგეტიკის, წარმოებისა და ლოგისტიკის სფეროებში.

2023 წელს ქვეყნებს შორის სავაჭრო ბრუნვამ, წინასწარი შეფასებით, 1,5 მლრდ დოლარი შეადგინა.

ბაქო და თბილიდი არიან სტრატეგიული პარტნიორები და აქტიურად თანამშრომლობენ როგორც ორმხრივ ფორმატში, ასევე საერთაშორისო პროექტების ფარგლებში. კერძოდ, მთელი რეგიონისთვის სტრატეგიული მნიშვნელობის პროექტებში. ესენია ბაქო-თბილისი-ყარსის რკინიგზა, ბაქო-თბილისი-ჯეიჰანის ნავთობსადენი და გაზის სამხრეთის დერეფანი.